Kelly中招爆唇見紅
天后陳慧琳（Kelly）上周六在雷頌德（Mark）的演唱會上，硬食「爆肌」陳曉東的一記「昇龍拳」，無情力令Kelly即場「見紅」，然而前晚二人合唱時，Kelly表現從容未見避忌；而天王黎明又繼續爆出「金句」，「訓話」Mark要尊重前輩。
一連三場的《雷頌德THANK YOU演唱會》前晚結束，獲陳奕迅（Eason）、丁子高、洪天明夫婦等撐場，白雪仙於十時半現身捧黎明場，甫開場，Kelly及陳曉東（東東）合唱炒熱氣氛，但原來二人在第二場的同一環節上曾釀成「血案」。
負傷繼續獻唱
有讀者提供當晚事發時的照片，指Kelly和東東同場獻唱時，Kelly硬食表現亢奮的東東一記「昇龍拳」，被打中的Kelly當場昂頭掩嘴，但她仍繼續獻唱。事後其經理人承認Kelly「受襲」，撞損嘴唇及有少少血，而東東的經理人就解釋當晚二人企得太近跳舞所致，亦為此抱歉，希望Kelly無恙。
前晚，陳曉東在solo環節着上魚網透視裝騷肌獻唱，透露自己為了演出而狂「操肌」，他又落台同粉絲握手，更被扯實不放。而楊千嬅在台上不時「抽衫抽褲」，笑言生Ｂ後清減不少，她獻唱過後就回到VIP席上睇騷，又讓座給姍姍來遲的仙姐，自己則跳落下一行同老公丁子高孖住坐。
在頭場被Mark「直斥」着得hea的馮德倫（Stephen）自爆已向Eason借衫，台下的Eason亦表示借出波鞋，但Mark卻說：「乜Eason品味咁差！」他又在台上問Stephen：「你感情生活dry唔dry？報紙寫你拍拖，好多女o架喎。」Stephen勁尷尬的說：「甚dry啦，不如講下dry嘅死因啦！」
黎明公然訓Mark
在壓軸環節，Mark憶述同黃霑的軼事，叫大家要珍惜老人家，此時黎明出場並拋出金句「訓話」：「你又講錯嘢喇，霑叔六十幾歲走，唔算老人家，係前輩，若果你六十幾歲畀人叫老人家都唔開心啦，正如你唔會叫爸爸老人家咁。」黎明又指霑叔的粗口不污糟兼令人開心，又抵死叫Mark：「有冇勇氣依家試吓講？」
臨近尾聲Mark自彈自唱，與老婆隔空互相說「愛你」，現場又播出黎明抱住Mark囝囝甜笑的相片，十分溫馨。完騷後，提到黎明的抱囝相，Mark表示未見過黎明「笑得咁甜」，指不會催他生Ｂ。而Kelly就表示待時間充裕有意開騷。
文：音樂組