苟芸慧喪電唯唯 河馬眼冤
【鄺蔚霆番禺直擊】早前「宅男女神」苟芸慧與舞台王者郭富城傳緋聞後，心情低落體重一度失控，近日幸得曾多次合作兼風趣隨和的好友梁烈唯安慰，令Dry爆的她心情靚番，懶理唯唯是否將為人夫，一於黐到實！兩人早前到長隆野生動物園拍特輯，明明幫河馬刷牙，苟姑娘卻一直分心向唯唯送秋波放電，又拉對方到一角耳語，令河馬Liza也頂唔順發爛渣！
華姐冠軍苟芸慧向來深得異性喜愛，緋聞不斷，但可惜都是爛桃花。早前她被指介入郭富城及名模熊黛林的戀情，心情一度跌入谷底，幸得不少好友支持，據知個性搞笑的男藝員梁烈唯最得苟姑娘歡心，雖然唯唯已有拍拖10年的女友Tina，更被拍到揀婚戒，但苟姑娘仍視對方為水泡，不避嫌在這段Dry爆期向唯唯傾心事，早前兩人到長隆拍特輯，苟姑娘全程黐實唯唯。
擋屎護女神
當日他們到長隆野生動物園拍攝《反斗紅星放暑假——長隆非常任務》，要完成幫河馬刷牙的任務，首先兩人要引河馬上水，唯唯搞笑大唱求婚歌，氹得苟姑娘笑晒，但河馬就不太受落，其中一隻更突然轉身向兩人「開大」，唯唯即Man爆以身擋屎，令苟姑娘冧到爆！其後他們開始為河馬Liza刷牙，惟苟姑娘勁不專心，無視Liza只望實唯唯，不斷拋媚眼釋放「數萬Watt電力」，被電暈的唯唯似乎相當受落，High爆地扭住Pat Pat舞動牙刷！眼見兩人在面前打情罵俏，Liza亦睇唔過眼，怒將牙刷咬斷宣示不滿，場面搞笑！
合作有默契
據知情人士透露，兩人全程旁若無人不停細聲講大聲笑，苟姑娘更趁不用埋位時拉唯唯到一角咬耳仔！導演見兩人愈玩愈Close，「送他們一程」即場加咀戲，兩人亦爽快應承借位搞掂。其實「苟唯」屬同一經理人旗下，曾在劇集《飛虎》、電影及微電影中演情侶，苟姑娘曾透露「有少少鍾意咗」唯唯，大讚對方是女人湯圓，早已暗生好感。
對於被指向唯唯放電，苟姑娘昨日接受電話訪問，聲稱兩人關係猶如兄妹，有默契要互相照顧，不怕Tina嬲：「我好欣賞唯唯咁專一，我同Tina都會約飲茶，（你電到佢暈陀陀？）我哋要扮情侶，佢演技好，識搞氣氛啫！」唯唯亦讚苟姑娘是女神，承認她電力驚人，但自己有未婚妻是絕緣體，問到有否一刻動心？他竟狠心地派檸檬：「從來冇，我已經清心寡慾，再靚都冇用！可能係觀眾覺得我哋襯。（Tina有冇擔心？）唔會啦！佢識晒我所有朋友，最多係驚我食太多嘢搞到肚痛。」對於苟姑娘被指體重達百五磅被纖體公司嫌棄，唯唯維護她說：「佢係壓力型水腫，大家畀啲空間佢，佢就會變番瘦變番索！」