官恩娜失手機無懼洩密
官恩娜（Ella）出名論盡兼大頭蝦，前日她與朋友到尖沙咀撐枱腳，當點菜完畢發現放在枱上的手機離奇「失蹤」，Ella為息事寧人沒有即時報警，她坦言手機內只有愛犬相，慶幸手機中的藝人聯絡全是化名，她無奈說：「當破財擋災。」
Ella前晚在社交網Instagram上載用手遮眼、張開口的自拍照，並留下「我的電話給偷了……呀！」引來不少歌迷留言安慰，Ella昨日透過電話詳述手機不翼而飛經過，她以「好離奇」形容事件，她說：「同朋友喺尖沙咀一間餐廳食嘢，點完嘢食發現唔見咗部手機。（朋友見唔到？）我就係同佢研究緊另一部手機囉。」
內藏愛犬照
問到會否懷疑是餐廳職員所為？Ella說：「冇咁諗，因為都有好多人經過。（點解唔報警？）唔想搞大件事，加上自己都大意，惟有下次小心。」Ella承認經過此教訓後會將電話放在袋內，問到手機有冇慾照？Ella哈哈大笑：「冇情慾照、冇親密相，全部都係狗仔嘅相。」
自嘲科技白癡的Ella說：「因為對電子嘢唔係咁叻，所以唔會放太多嘢落去。（洩露藝人電話？）我係用化名，同埋偷我電話嘅人都會立即攞去賣。」問到外籍醫生男友有否安慰？Ella說：「佢知呀，叫我小心啲囉，我咪當破財擋災。」Ella更遭同事取笑說：「佢哋叫我將個電話吊喺心口。」
文：音樂組