Rika被屈「小三」退選港姐

每年港姐競選也成為港女的是非之地，「嫩版徐若瑄」Rika參選後被大起底，任職空姐的她被揭出身公屋卻在社交網站自貼「貴婦」生活，更被指介入空少婚姻，又令空少有離婚及輕生念頭。Rika昨接受本報電話訪問時稱，前日收到無綫通知入圍，但有感影響家人及朋友，經一日慎重考慮後決定退選：「今日（尋日）無綫打咗好多次電話，我都聽唔到，之後我同番無綫講我要退選。呢兩日出咗好多關於我嘅報道，影響咗身邊無辜嘅朋友同家人。我目標好明確，只係想做生意，生意已經開始緊，但未透露得住。」

籌委會頭痕

Rika否認是「小三」，又澄清相中人並非「男主角」：「冇呢件事，只係舊公司傳嘅緋聞，個男同事喺training識，只係普通同事，亦從無同空少拍拖。（點解喺敏感時期退選？）唔想影響家人同朋友，（係咪怕再有是非流出？）相信都冇，都爆得七七八八。」雖然Rika放棄參選，但她坦言：「有娛樂公司想簽我做藝人，本身都想拍戲做打女，好似章子怡咁！」而Rika亦懶理是非，昨日穿三點式到沙灘曬太陽。據知，無綫會選出16個本地佳麗及3至4名的海外佳麗入圍準決賽，並陸續聯絡入圍佳麗。由於Rika退選，港姐籌委會將於日內了解及商討要勸她繼續參選還是尊重她本人決定。

Tam離奇變臉

另外，「中印混血兒」Tam（歐陽巧瑩）的身邊同學透露，其國字臉及豬膽鼻突變V煞臉及間尺鼻，之後她已刪除舊照，免被起底；而她平日常坐靚車出入，相信家底豐厚。至於另一參選佳麗Kendy Cheung被爆料指曾在芝加哥任職財務分析員，今年2月更到三藩市參加全美華埠小姐勇奪季軍，連陳法拉、王君馨等也曾參加此選美比賽。

本報接到讀者爆料，指有參賽者於灣仔一間私人會所「工作」。外事部副總監曾醒明昨被問到若有參賽者於私人會所「工作」，會否不被接納參選時，他稱若有正當職業又沒違法，是沒有問題的。

文：專案組