吳綺莉：點都要嫁一次

吳 = 吳綺莉　

張 = 張文慈

吳綺莉笑言可能會搵個老外男友，因為自己喜歡整brownies。

吳綺莉選亞姐時，穿上泳裝大晒身材。

當年為拍拖推通告

張：我1996年選亞姐，記得你係1990年嘅大熱。你嗰屆我好留意，因為有朋友參賽。

吳綺莉經常與女兒吳卓琳孖住外出。	張文慈為了照顧家人，曾錯失良緣。	同是亞姐出身的吳綺莉（右）與張文慈，期待姻緣來臨。

吳：我選嗰年得11歲（說笑），哈哈，轉眼就23年嘞。

張：當年我好留意你，記得你由頭帶到落尾，最後仲攞埋冠軍添。

吳：參加亞姐係我人生一次好難忘嘅經歷，當年我做暑期工畀設計師劉娟娟推薦參賽，仲有得去巴黎拍外景，被安排着嘅晚裝，件件都稱得上係古董，搞到我哋好似公主咁。當年喺凱旋門着住三點式泳衣，21個女仔一字形咁排開行catwalk。最衰同最失敗嘅，係我冇keep低啲相囉。

張：真係同人唔同命，我嗰年只係返內地贊助商嘅樓盤拍咗一日外景咋。我仲記得你嗰屆好多新聞，好似話有佳麗嘅服飾發現有痕粉，而我嗰屆就發生臨場旗袍失竊，結果出場前都搵番。

吳：可能我比較自我，只係想做好自己啫，所以冇留意新聞，又真係唔覺有人針對自己喎。

張：我就係欣賞你為人夠硬淨，有自己嘅一套想法，真係圈中少見。

吳：但某程度上就因為太自我而唔合群，形成咗性格上嘅一種弱點。如果我識做啲，可能依家已經發咗達唔知住咗去邊嘞。

張：你入行之後都一帆風順啫。

吳：都可以咁講嘅，回想喺亞視嘅一年，我拍劇次次都做主角，出面又有好多電影公司搵我……可能一切來得太易，唔識珍惜，喺事業最高峰時就學人拍拖推通告囉。

女兒係人生目標

張：我入行後好快就有機會同偶像梁朝偉合作，呢鋪都算代表作，哈哈！講番你性格硬淨，當年你有咗BB，喺處理問題上都好冷靜喎。

吳：應該咁講，我覺得問題唔係要嚟諗，係要即刻搵辦法處理嘅。你可以喺屋企「揼地」，或者唔開心，但點都要企番起身，除非你死咗嘅啫……當時實在有太多事要解決，所以我冇時間諗無謂嘢，亦從來冇諗過唔要佢。好記得有朋友當時問咗我一句：你有咗開心定唔開心吖？既然開心就OK嘞，而事實證明，我無後悔生咗呢個女，佢依家係我最最最好嘅buddy。

張：身邊好多閨中密友生咗BB，都會同我講做媽媽嘅好處，之前繆非臨苦口婆心話，Pinky，你一定要生BB ﹗講真我認我恨嫁，仲有好強烈嘅感覺，自己會係閃婚一族。

吳：我都好慶幸有個女，有人話老公、男朋友有機會變成人哋嘅，而兒女始終係自己嘅。如果唔係有個女，我可能冇乜人生目標，冇嘢做咪約人食飯、劈酒囉，但依家只會急急腳返屋企。我哋兩個咩都會傾，就算識男仔嘅嘢都會攞出嚟分享，有時我仲會撒嬌同佢講，今日有嘢唔開心，你畀我呻十分鐘啦……搵到錢可能係物質上嘅滿足，但家庭生活先係心靈上嘅一切。

張：我都恨有頭家o架，以前可能有啲追求者自己都心動過，但我唔可以放棄照顧屋企嘅責任同佢「遠走高飛」，某程度上都錯過咗一啲嘅良緣，依家婆婆返咗天家，家姐細佬又有晒感情依歸，我覺得自己可以搵番自己囉。你覺得女人係咪點都應該嫁一次？

吳：梗係，做人咩都要試，我嘅其中一個願望，都係搵到個伴o架。某程度上，我感覺自己可能會搵番個老外，因為得閒我都鍾意整brownieso架，哈哈！

後記

外表硬淨的Elaine給人「天不怕、地不怕」的感覺，這天卻被Pinky踢爆她的「心魔」，Elaine大方直認：「係呀，我好驚搭飛機，之前喺上海十幾年，我次次係坐火車返嚟。試過出埠拍旅遊節目，全程機我捉實前面個電視，唔食嘢唔瞓覺，坐喺隔籬嘅梁榮忠以為我傻嘅。」反觀Pinky試過一次由泰國返港遇上九霄驚魂，以為自己九死一生，但事後卻全無心理陰影，「勇」字當頭比Elaine更硬淨。

文：影視組

攝：李柏儒

化妝：（張文慈）Heidy Kam

髮型：Enthan Ng@Hair