詹瑞文胸狠插 鵬哥失守爆粗
「扮嘢王」盧海鵬與詹瑞文前晚在紅館舞台扮演多位巨星，以美國天后麥當娜經典尖胸造型示人的詹Sir，不停「胸壓」鵬哥，為搞氣氛又不斷講諧音粗口，令鵬哥忍不住兩度爆粗，全場捧腹大笑。
一連兩場「詹瑞文盧海鵬紅館奇幻扮嘢大典」前晚開鑼，詹Sir及鵬哥分別扮演美國天后麥當娜、韓國人氣歌手PSY、已故歌手羅文、盧冠廷及陳奕迅，鵬哥除與嘉賓劉以達組成「撻成一塊」外，更與余慕蓮以情侶檔唱粵曲，由於余慕蓮穿Tube Dress晚裝亮相兼背住升上台，被鵬哥取笑說：「後面睇一支花，前面睇似我阿媽。」
鍾意扮嘢頂硬上
詹Sir以麥當娜經典尖胸look出場，期間多次胸壓鵬哥，搞到鵬哥大叫：「唔好隊啲嘢過嚟！」詹Sir食住個勢大講有味說話：「我想插你一嘢！」然後將道具「尖胸」打開露出兩個平安包，笑言其中一個是奶皇平安包。詹Sir全晚不斷講諧音粗口挑釁鵬哥，雖然鵬哥強忍三字經，但最終失守講「打你老×」及「×你老味」，笑爆全場。
鵬哥與詹Sir齊齊穿上徐小鳳經典波波裙亮相，鵬哥說：「扮我哋家姐徐小鳳最緊要係個豬唇。」之後兩人扮超人，分別在心口貼上「正」及「能」字樣，笑言要向大家發放正能量，銀幕上卻打出「我哋全部都係正能樣」諧音粗口字句。鵬哥坦言當初不敢承諾做此騷，他說：「年紀大怕頂唔順，但自己又鍾意扮嘢，梗係死人都頂啦！」
文：音樂組