朱茵冇勸Paul收火：唔理係最高做法
回復索爆身段的朱茵昨日出席活動分享湊女經，提到老公黃貫中（Paul）與前Beyond隊友黃家強的恩怨，她坦言沒有理會：「咁多年都睇淡晒，唔理係最高嘅做法！」更指老公每次見到囡囡「叉燒包」即收火，冧到謝晒皮。
已為人母的朱茵昨日以「奧比斯兒童大使」身份出席活動，見她修身後回復索爆身形，與小朋友玩遊戲時盡顯母愛。當年有傳Paul和前Beyond隊友黃家強反目與朱茵有關，提到兩人恩怨近期又再翻炒，朱茵表示忙於湊女無暇理會：「愈理只會愈多是非，每到呢個月份就有呢啲新聞，咁多年都睇淡晒，唔理係最高嘅做法！」問會否叫老公不要再多提？她笑言Paul每次見到七個多月大的女兒「叉燒包」黃鶯即收火：「佢望住個女就溶晒，冧到謝晒皮，對住我都冇咁冧。」
父親節玩煮飯仔
朱茵分享早前與Paul到尼泊爾探訪的感受，表示要丟低囡囡非常不捨，要每日一電解相思：「都擔心如果兩個一齊有意外咁點算？好多地方都好偏遠，但去完有好深體會，更覺我哋生活好奢侈，所以唔想個女想要乜就買乜。」她強調與Paul絕非怪獸家長，不希望女兒太早有讀書壓力：「有朋友催我搵學校，我頭都痛，覺得係受苦咁，abc、123遲早識，想個女四歲先入學，呢段時間想佢開心同接觸大自然，唔想佢半夜做功課做到喊，有調查話小朋友11點後瞓長唔高o架！」
提到生BB後的首個父親節，朱茵表示會一家三口齊齊過。Paul昨日接受電話訪問時稱希望留家玩煮飯仔：「平時我煮開，不過朱茵話想親自下廚。囡囡好早識叫我阿爸同Paul，聽到好開心，一見到佢就咩煩惱都冇晒！」
文：影視組