甄澤權冇煮見 袁嘉敏又愛又恨
前港姐袁嘉敏（Candy）入得廚房出得廳堂，早前她教魔術師甄澤權（Louis）整cake，結果被「初哥」激到紮紮跳，Louis即變魔術氹番女方，Candy直言喜歡不懂下廚的男生：「佢頭先個迷惘樣幾得意！」
Candy日前向好友Louis傳授整Cake秘技，首次入廚的Louis雞手鴨腳，連打蛋都搞到一鑊泡，激到Candy紮紮跳用棍扑他，Louis惟有使出變魔術氹對方。他將草莓由左手變到右手，Candy見狀O晒嘴。她謂：「我好近望住都唔知點解會變走咗，快啲話我知，唔係我瞓唔着。（鍾意玩魔術嘅男仔？）佢變魔術好叻，但廚藝就呆呆哋，咁樣我可以喺廚房威番，佢頭先個迷惘樣幾得意。」
中國菜最複雜
獨居的Candy一日三餐自己煮，她說：「西、中餐我都識煮，有時會焗cup cake，最拿手係意大利菜意粉、pizza之類。我好鍾意焗爐，因為焗完啲嘢，間屋成晚都有麵包香，好溫馨嘅感覺。中國菜最複雜，上海菜我呢世都唔會掌握到。」Louis則笑謂不太享受煮飯仔：「間中焗一次蛋糕都開心嘅，但日日煮飯我未必會咁好心機。」
主持飲食節目
廚藝了得的Candy最近獲邀主持飲食節目，她謂：「喺電視煮嘢好大壓力，好似《都市閒情》最多畀你煮十五分鐘，之後會剪走中間個過程，但你唔可以整半個鐘，叫人剪到六分鐘，所以要快過屋企好多倍。」
文：影視組
攝：李柏儒
場地：WARENDORF
化妝、髮型：Seci K