萬綺雯作惡奸到喊
萬綺雯（蚊蚊）在無綫新劇《好心作怪》中獻出多個第一次，除了是入行24年來次首次演反派，又有出浴戲和偷情床戲，劇中演苗僑偉（三哥）老婆的蚊蚊為老公壞事做盡，她說角色沉重，令她不能抽離，幾乎每次收工都要喊一場才能入睡。
入行24年的萬綺雯由亞視到最近轉投無綫都未演過大反派，她於無綫新劇《好心作怪》就作新挑戰。原來蚊蚊最初推了《好》劇：「因為當時要同時拍《老表，你好嘢﹗》，咁多年都冇試過同時拍兩套戲，後來監製叫我聽吓故事，我聽完好鍾意，係因為做反派先接，過無綫就係想試新嘢。」
感謝老公支持
蚊蚊今次亦獻出多個第一次，如拍偷情床戲和出浴騷背戲，她說最尷尬是要在錄影廠拍床戲：「嗰時放消夜打畀老公，我話好驚，好多人望住，老公以為我發生乜事，佢話冇嘢喎，叫我放膽順劇情做，可能佢係編劇會明，佢係個超級大方嘅老公，好支持我。」雖然演反派，但蚊蚊不怕會被師奶罵，她說：「個角色做咗好多衰嘢，但奸得有原因，全為愛佢老公（苗僑偉飾），我鍾意個角色，有人鬧其實係成功。」
拍劇經驗豐富的蚊蚊今次也走火入魔未能抽離，她說：「成套戲好沉重，我得幾場戲係開心，做人唔好做壞事，我做戲都覺得唔好受，情緒自然代入去。套劇又多歇斯底里、情緒起伏好大嘅戲，幾乎每晚收工都要喊一場先瞓到，有時揸緊車都喊住返屋企。老公見我咁，一拍完就同我去咗峇里島享受陽光海灘，咁就冇晒事。」
為愛不顧一切
至於在劇中與三哥的夫妻情，蚊蚊形容感覺來得輕鬆：「大家都知我係為愛情不顧一切嘅女人，所以好容易搵到個感覺。」對於有指《好》劇能挽救無綫近期的收視，蚊蚊希望大家不要給演員壓力，但她對此劇仍很有信心。