鍾舒漫生日恨聽張致恒低B歌
即將生日的鍾舒漫（Sherman）早前包起全家飛往馬來西亞度假，原來此行是乖女Sherman悉心安排，為同是6月生日的爸爸慶祝，至於自己的生日願望則想有人唱首「幼稚歌」畀佢聽，未知緋聞男友張致恒可會識做？
歌手鍾舒漫將於本月20號生日，適逢父親節及爸爸生日將至，孝順女Sherman早前包起全家飛往馬來西亞玩足五日四夜，Sherman笑指爸爸十足十細蚊仔：「我哋送咗手錶、銀包同一部智能電話畀佢，佢真係愛不釋手，唔理其他禮物淨係掛住篤手機，佢仲識開家庭聊天群組添！」
由於屬印尼華僑的爸爸熱愛亞熱帶地區，所以Sherman同妹妹連日來都化身「跟得乖女」，放棄「濕平」機會，陪爸爸四圍睇風景，當中他們最喜歡一望無際的大禾田，爸爸媽媽更「忍唔住」血拚當地靚米及新鮮蔬菜等，大廚媽咪就體貼地「露兩手」，煮熟粟米饗一家人做早餐。
被笑黑妹
不過，回港後Sherman慘被同事取笑「黑上加黑」及「返完鄉下」，但Sherman卻一於少理，反擊說：「我都冇打算變白！」問到她有何生日願望？Sherman投訴說：「想屈啲朋友整蛋糕畀我，因為次次都我整！」可會叫緋聞男友張致恒整「愛心蛋糕」？她就扯開話題說：「唔使！但我反而想人哋唱歌畀我聽，就算好幼稚都冇問題，唔一定情歌o架！」
文：音樂組