黃百鳴處男代言 出trip「茶」察
黃百鳴及羅霖昨日到跑馬地馬場，出席《福源「有機沉香茶」產品發布會》，黃百鳴說：「我入行咁多年，第一次做代言，之前我都去了解過沉香嘅資料，去咗馬來西亞沉香園視察，又有親身試飲過呢隻茶，你唔覺我靚仔咗咩？希望將呢隻茶推介畀大家，希望幫到大家。（酬勞如何？）OK！」他又透露正籌備新片：「谷德昭導演嘅賀歲片會有吳君如、熊黛林；陳慶嘉導演嘅愛情喜劇有古天樂，（預埋吳千語？）同古仔唔襯，佢襯林峯多啲！」
羅霖則現身力撐好友黃百鳴，又稱：「我呢幾年煩屋企事，失眠問題困擾咗我6年，都想試吓呢隻茶可唔可以令我心境平靜。遲啲我會帶3個仔去日本旅行，要先抖足精神！（感情狀況點？）都feel到有人鍾意，但過多排先啦！」