打碟Chris做臥底：預咗要還

無綫真人騷節目《求愛大作戰》收視逐步上揚，前晚收視比首集上升3點，收21點，8位男參賽者與6位女仔進行埋身戰後，更具追看性。不過，經上次《盛女愛作戰》被指沉悶後，無綫即搞搞新意思，於今晚一集「大爆料」，原來當中的男參賽者「打碟Chris」是無綫安排的臥底，直至節目播出前，其他參賽者也被蒙在鼓裏，他更曾相約一班「兄弟」出去飲酒，偷錄「兄弟」的心底話！記者昨致電Chris，他坦言：「佢哋一個都唔知，之前我應承時係冇諗後果，依家愈來愈驚，不過出得嚟行，預咗要還，下次有聚會都要搵多兩個人陪，導演仲講笑話有乜事第一件同我call白車。」

Karl獲撐多人睇

形象顧問Karl被指不男不女，更不時高調凸顯自己，對此編審岑應謂：「公司冇叫過佢咁做，好多人都係為佢而睇。（佢似乎好想入行，無綫會否搵佢工作？）要睇吓觀眾接受程度。」無綫外事部副總監曾醒明表示接到兩宗投訴，指顧問未夠資格，他表示拍攝期間已料Karl最具爭議性。而通訊管理局至今接到此節目共25個投訴，指節目內容無聊、有歧視成分等。

Sharon愛「集郵」

至於女參賽者之一的「爛面Sharon」在前晚播出的一集表現寸嘴，既指Rocky似野獸，又指眾男是「岩巉」礦工。本報在網上發現Sharon於Facebook上載不少擔任模特兒的照片，喜愛「集郵」的她，更與劉嘉玲、甄子丹等紅星合照；另一名參賽者Whitney也愛晒與星合照及嘟嘴自拍照，港女味十足。

文：影視組