陳智燊窮剩50蚊 翻身做男神

竹升幫受女性歡迎

「竹升仔」形容在外國長大的男生，特徵講得一口流利英語兼唔鹹唔淡的廣東話。「竹升仔」在娛樂圈發展甚為吃香，前有吳彥祖後有林德信，都特別受女粉絲歡迎。而電視圈男神則有陳智燊做代表，Jason於英國倫敦大學經濟系畢業，生得靚仔有型，難怪成為新一代筍盤，近期更獲無綫力捧，一劇接一劇，人氣急升。

「『筍盤』呢個名其實都係大家畀我嘅鼓勵，我覺得自己做戲同做主持可以再好啲，觀眾喺呢個時候留意我多咗，有觀眾緣係一件開心事，不過可遇不可求嘅，公司又錫我，成件事覺得好幸運，當然我自己都有付出努力，覺得我嘅際遇好正，好開心。無綫唔同類型嘅節目我好多試過，例如旅遊、綜藝、大型節目司儀、拍電視劇，當然台慶司儀如果公司畀機會我，都會想去做啦。」

陳智燊獲網友封為男神，回想初入行之時卻嘗了不少苦頭。	同是竹升仔的吳彥祖及林德信都在圈中創出好成績。	林德信

Jason大學畢業後做過兩年文職，之後嫌工作苦悶，故把心一橫辭職加入藝員訓練班，那年Jason已經二十七歲，相比之下入行年紀比較大，又要從頭學習，絕不是一件容易的事。

陳智燊在《幸福摩天輪》跟鍾嘉欣合作即獲好評。	Jason與《誰家灶頭無煙火》拍檔親似一家人。	Jason發揮搞笑本色。

「當初入行嗰陣我都介意年紀大嘅問題，不過有導演同我講，任何生活上嘅體驗都可以幫你搵到感覺去做戲，可能係自我安慰啦。雖然我係遲入行，好多嘢都慢上手，不過相反嚟睇人生經驗比人多，處事方面都可以幫到我好多，有時我喺度諗，如果我年輕嘅時候入行，又唔定性嘅話，做嘢又唔認真，好多機會都會浪費咗。我好好彩喺事業道路上無咩迷失過，雖然啱啱入行嗰陣，我只喺係明珠台主持《港生活．港享受》，不過當時對於未有任何對住鏡頭訓練嘅我，就已經有一個屬於自己嘅節目，我已經好開心。」

星途崎嶇家人接濟

笑言發明星夢的Jason，終於一償所願，加入無綫拍電視劇。自幼在英國長大的Jason有家人照顧，不過到香港發展，起居飲食就要靠自己，他坦言曾有財政困難，要家人接濟。

「我有一個哥哥同細佬，我成日諗如果我唔係排第二嘅話，我未必會考慮入娛樂圈，因為如果我係大佬就要兼顧屋企。我好幸運，我哥哥係做牙醫，講得自私啲，覺得屋企有佢照顧，我就可以好放心咁返香港試吓入娛樂圈。啱啱入行嗰陣，收入唔係好多，香港租樓又貴，頭嗰幾年生活好慳。曾經試過去銀行錢，戶口得番五十幾蚊唔到出嚟，當時諗要入多四十幾蚊先可以完整地到一百蚊，令我醒覺真係要慳啲使，雖然咁講好似好慘，但我份人好樂觀，無覺得迷惘，當時屋企人都知道我財政困難，都有少少金錢上支持我。入咗行反而同屋企人話題多咗，我知道佢哋擔心我多咗，媽咪成日都有喺英國睇我演出嘅電視劇，不時畀意見我。」

感激伯樂前輩提攜

入行八年的Jason機會不斷，相比同期新人幸福得多，他坦言要感激一路上支持自己的「伯樂」。

「要多謝嘅人有好多，其中一個要多謝監製潘嘉德，佢係第一個拍劇嘅監製搵我，好記得當時我仲做緊娛樂新聞台，我哋喺公司走廊撞到，佢話喺電視劇《歲月風雲》有個角色想搵我做，聽完真係好開心，心諗又唔知係唔係，雖然個角色戲份少又無咩對白，但我已經好開心，好滿足！我好幸福有好多前輩畀意見我，教我點樣去做戲，就好似拍《誰家灶頭無煙火》嗰陣，大家好似一家人，相處好融洽，大家好錫自己。」

Jason近年在電視劇《幸福摩天輪》一嘗男主角滋味，更獲得網友封為男神！不過網絡世界中，當然有彈有讚，有網友指Jason講對白兼做戲生硬，面對種種批評，Jason表示樂意接受。

「我大概知道自己水平去到邊，有人畀意見自己就要虛心學習。如果我一出嚟做戲好似黎耀祥咁叻，咁就不得了，就算我做戲有黎耀祥嘅一半功力，觀眾睇我都唔會覺得我合格，個距離好大o架！唔好將自己嘅標準set係自己度，又唔好將自己嘅標準放喺佢度，咁樣係做唔到。就算觀眾畀意見你，如果係啱嘅，要聆聽一下，我都知道自己啲戲係要改善，我會將唔開心變為推動力，將件事做好啲。」

後記：

原以為靚仔小生會好姿整，不過與Jason做訪問，他乾淨利落，每次應攝影師要求擺甫士又沒有半點怨言，認真專業。雖然Jason貴為上位小生，不過絕無半點架子，認真抵讚！

口述：陳智燊　

筆錄：林倩怡　

攝影：黎志輝　

場地：千福大少