志偉無條件釋放：馬照跑舞照跳
曾志偉去年12月5日於前港姐鄭嘉雯婚宴中，捲入黃浩報稱被掌摑事件，隨後被警方拘捕並多次出入警署保釋候查。事件擾攘約六個月，昨日曾志偉在大律師盧敏儀陪同下到中區警署再次報到，結果獲警方通知無條件釋放，事件總算告一段落終於「還我清白」。事後問到曾志偉當日被拘捕返警署時，是否需要按程序打手指模及拍照存檔，他坦言奇怪一件小事亦需要接受這程序，但他仍表現出其樂天性格指這當作是一個學習，笑言日後可將經歷套用在電影上，更說馬照跑、舞照跳。
昨午三時曾志偉在大律師盧敏儀陪同下抵達中區警署，在車上面帶笑容的他還向在場記者揮手，似是胸有成竹。眾人在警署逗留了近40分鐘後離開，上車前曾志偉更向在場人士揮手道別，離開時車上的志偉笑容滿面兼直豎拇指。隨後他到了九龍塘用膳，離開餐廳時有傳媒等候，他笑住回答記者提問，做了一個簡短訪問。
記：無條件釋放心情如何？
曾：平常心。係會覺得無事，相信香港法律，有司法公正，結果冇令我失望。
記：會唔會慶祝？
曾：唔會，平常心，有冇事都要食飯。今日係好日子，今日係跑馬，馬照跑、舞照跳。
記：有冇曾經作最壞打算？
曾：可能中間有閃過一吓萬一，但覺得冇需要再諗。
感覺朋友可貴
記：事件付出很大代價？
曾：時間囉，因為要轉擔保、令朋友擔心。但事件得到家人、朋友支持。最想多謝盧敏儀，佢全程陪住我，畀好多信心我，話一定會冇事。家人支持係必然嘅。今日都接到好多朋友電話同訊息。好多謝大家關心。
記：最窩心係咪得到朋友支持？
曾：由事件發生咗之後，有好多法律上嘅朋友打電話畀我畀意見，有啲以為係一般嘅朋友、好耐冇見嘅朋友，但係其實係佢哋最早打畀我，原來真係好多關心我嘅朋友。
記：點睇成件事？
曾：兩個字，放下。覺得件事擺低咗，由出警署門口一剎那已經擺低咗。
未有求神問卜
記：有冇曾經求神問卜？
曾：冇，我唔係迷信，有啲事啱就係啱，唔會因為錯，你去求一求就變成啱。
記：事件有冇影響過工作？
曾：冇，發生事後，每一次都係由朋友提起，平時我都冇擺喺心，唔想因為呢件事影響到自己。大家清楚我為人，多謝大家一直以來嘅支持同關心，事件終告一段落。
記：被拘捕時曾經需要打指模同拍照存檔？
曾：當時第一個感覺當然係覺得好奇怪，點解咁小事要做呢啲程序呢。第二件事，我已經當咗係學習，原來第日拍戲我哋係要咁做先至係正確，所以平常心面對整件事。
獲無條件釋放後的志偉，全程有笑容和向記者揮手道別。而警察公共關係科證實，「就於去年12月5日晚上在金鐘道88號發生的一宗普通襲擊及刑事恐嚇案，警方經調查及諮詢法律意見後，一名60歲姓曾被捕男子已獲無條件釋放。」
文：影視組