陳法拉離巢 Regen乘虛而入
剛滿約無綫的陳法拉於兩周後遠赴美國進修，其主演兼被視為重頭劇的《衝上雲霄II》則於7月15日播出，為隆重其事，無綫於月尾將展開宣傳活動，並call齊吳鎮宇、張智霖、吳卓羲及胡杏兒等大卡士為該劇造勢。不過，過去「離巢」猛將均絕迹宣傳活動，如過檔香港電視（HKTV）的張可頤，以及傳加盟HKTV的蒙嘉慧，均被視為叛將，不獲邀參與劇集《天梯》和《仁心解碼II》的活動。但恢復自由身的法拉，可謂「同人唔同命」，早前她識做地對外聲稱去向未定，故獲網開一面，將破例出席《衝II》宣傳。
大呻難請假
對於有份參與該劇宣傳，法拉透過電話回應：「其實我去讀書，冇商業上嘅衝突，我作為演員之一，配合宣傳係我嘅責任。」她又坦言已收到該劇監製陳維冠的宣傳通知，並謂：「第一個活動係六月底去馬來西亞，呢個宣傳我都要特登請假，由紐約直接飛過去，不過開學後我就唔可以成日請假。（之後可配合宣傳？）唔知，暫時收到一個宣傳，之後再配合啦，講真好難請假，由紐約飛去香港做宣傳都頗辛苦，機票都好貴。」
「15歲就識佢」
另女子組合HotCha成員Regen闊別三年再返無綫拍劇，昨日與岑麗香等為新劇拜神，曾被指密會Neway太子爺薛世恒而跟法拉傳不和的Regen，對於今次對方離巢她便開劇謂：「我咁有影響力都寧願叫無綫畀多啲劇我拍。」當問到二人無緣合作會否感到可惜，Regen口快快道：「冇喎，因為我哋都冇合作過。」隨後即補鑊說：「有機會合作都係好事，因為我細細個、15歲入行就識佢。」
文：影視組