千嬅子高怪獸家長 霸學位頻撲病倒
楊千嬅與老公丁子高的囝囝丁進諾（Torres）今日一歲生日，夫婦最近已化身星級「怪獸家長」為囝囝四出找學校，鋪排一條龍升學大計。而為兒頻撲霸定學位的千嬅雖然病倒，但大前晚仍不忘與親友為Torres開餐預祝生日，千嬅戴上口罩，為免傳染給眼仔睩睩的Torres，湊仔任務由其母代勞。
千嬅與老公丁子高向來對寶貝仔Torres寵愛有加，雖然囝囝今日才一歲生日，但早前夫婦二人除為愛兒舉行盛大的動物主題生日會預祝外，最近已急不及待，四出為囝囝往名校的幼兒班報名霸定位。化身「怪獸家長」的千嬅與丁子高，經連月找尋心水學校後，已安排兒子面試事宜，近日又要工作的千嬅，亦因頻撲而病倒。日前千嬅惟有派老公出動，當日下午約三時，丁子高前往灣仔區，夫婦二人心儀囝囝所讀的幼稚園視察，之後更前往附近滿布playgroup的大廈，似乎是順道搜集資料，期間更見丁子高邊行邊講電話，向老婆報告視察後的結果。
父母同行慶生辰
千嬅近日雖然病倒，但大前晚一家三口及父母晚膳，預祝囝囝Torres今日的一歲生日，當晚一行人由丁子高驅車到中環的酒店晚膳，至晚上九時一行人才步出，戴上口罩的千嬅為免傳染兒子，湊仔任務則全程由其母代勞，只見平時甚少被傳媒拍到的Torres，由千嬅母親抱着離開，於外婆懷中Torres肥嘟嘟極為可愛，眼仔睩睩十分精靈，婆孫上車後，千嬅則於車尾執拾一輪，才與老公齊齊上車離開，見攰極的千嬅，兩眼也睜不開。
讀書辛苦當鍛煉
丁子高其後接受本報電話訪問時，直認最近已為兒子找學校，他說：「已經搵咗兩間啱心水的playgroup，到時再二揀一，小學方面都揀過本地學校同國際學校，依家仲諗緊，因為想搵啲幼稚園一條龍直升上小學嘅。」問到太太意見如何，他說：「佢呢方面會聽我講，我以前讀聖若瑟，所以都想囝囝讀呢間，不過都要再觀察吓個仔性格先，其實我想個仔讀本地學校多啲，想佢有番啲壓力，等個仔有得來不易嘅感覺，因為屋企已經好多人錫佢，想嚴啲，讀書辛苦可以鍛煉吓佢，加上好多朋友嘅仔女讀國際學校，8，9歲已經講自由同人權，仲同父母有爭執，唔係唔講人權，但想從細灌輸佢要尊師重道觀念。」問到他是否擔任嚴父角色，他笑說：「講就咁講，但有時見到個仔就心軟。」
提到努力追女，他說：「的確好想，但太太仲要拍兩部戲先，因為上次佢有Torres時，撞啱好忙，見到佢佗BB時好辛苦，都於心不忍，所以今次追女都會好小心計劃同安排，最想追個馬女，因為屬馬旺我，個仔屬龍嘅，追到馬女的話，就龍馬精神。」
文、攝：追蹤組