周麗淇激罕晒胸招親

周麗淇擔任金飾品牌的大中華區代言人，昨日為「Just Gold鎮金店」拍攝廣告，一向身材欠睇頭的她竟罕有真空上陣，穿上紅色大露背Tube Dress及金飾，勁晒三吋事業線。不過甚少出「線」的Niki表現怕怕醜醜，更打趣用大會貼紙黐實事業線，又不時使出一招交叉手來擋胸防走光。

已準備好嫁妝

Niki直言為廣告效果才少有地性感：「廣告要有出嫁感覺，『平平無奇』唔啱，我終於明白到結婚件衫會令到自己更有自信。」她坦言沒有刻意谷胸，更忘記做足預防措施：「件衫好緊，一着上身就有效果。（做防走光措施？）唔記得咗，啱啱仲喺度食飯盒。」

可是一身新娘子look的她大嘆沒有出嫁感覺：「因為個男仔未出現，希望拍完快啲有。」她又笑言會趁在兩年代言合約期內速嫁，皆因有嫁妝贊助：「兩年內盡量啦，相信我拍拖都唔影響工作。不過媽咪其實喺家姐（周汶錡）出嫁時，已買多一套嫁妝畀我，感情就隨緣啦。」

望新劇高收視

而提到她主演的新劇將緊接收視再跌破新低的《金枝慾孽貳》播出，問到怕新劇收視會被拖累？她說：「唔怕，其實冇得比較，《金》所有演員都係前輩，我由小睇佢哋電視劇大，冇資格批評。」問有信心將收視「起死回生」？她稱：「唔知點答，總之希望套套劇都高收視啦。」

文：音樂組