杏兒 Bosco近距離零交流

為數約三百六十位無綫藝人，昨日齊集於電視廣播城拍宣傳片及影月曆大合照，眾星以「紅男綠女」T恤示人，盡顯青春活力，老闆陳國強開完股東大會後亦有「撐場」振士氣。因多位小生、花旦如林峯、鄭嘉穎、陳豪、陳法拉、楊怡等因工作關係沒有出席，造就了田蕊妮、蕭正楠有機「升呢」第一排，擺明「攝腳」！

各自搵「水泡」

至於視帝黎耀祥及阿姐級的鄭裕玲、汪明荃依舊穩站中間，馬國明亦企近中間位置，但無綫擺明「玩嘢」，將過氣戀人胡杏兒及Bosco編排一起企，再加個曾與Bosco傳緋聞的徐子珊，認真「眼冤」。其實，杏兒上年於台慶頒獎禮跟Bosco曾同場不相見，今次他倆碰頭「零交流」之餘，更企得離行離列，為免尷尬，杏兒不時與身旁的馬國明咬耳仔，Bosco亦唔輸蝕，不避嫌跟子珊傾個不停，杏兒更加全程「硬晒軚」。

杏兒受訪時死撐不尷尬，更生疏的以「同事」來稱呼Bosco：「都有一段時間冇聯絡，同事梗會見面。（放低未？）唔好講到咁嚴重。（會唔會復合？）點解今日陳豪、陳茵媺唔喺度？喺度就好啦！」不過Bosco受訪時則「死撐」在化妝間有跟杏兒點頭。說到今次是分手後最近距離接觸，Bosco說：「都係做嘢啫，正常做嘢。（會否合作？）睇公司安排啦，都係你哋搞到尷尬，根本冇嘢！」

馬國明攝位

徐子珊則大呼與Bosco的緋聞是很久以前的事，她說：「唔好玩我啦，冇嘢搵嘢嚟講啫！（陳國強都喺度。）老細梗係喺度，年年咁多活動，唔通唔使返工咩！」說到林峯被指與吳千語已婚，子珊則說若然屬實戥他開心！今年站於頭排中間位的馬國明對於被指「升呢」，解釋因上年拿得喜愛電視角色獎，所以與視帝都企中間位置，還打趣說：「啲大哥全部出晒去啫，返嚟個位畀佢哋攝番。」

文：影視組