彭丹孟瑤交峰 嘉樂被笑「冇扯過」

曾志偉主持的遊戲節目終極回歸,但主力「想當年」,遊戲亦較斯文驚喜欠奉,幸得兩代咪霸彭丹及孟瑤正面交「峰」增加吸引力,兩女又亂噏廣東話,孟瑤表示節目令她「食(識)咗好多朋友」,更笑錢嘉樂「冇扯過」,大灑鹽花!

由曾志偉主持的《超級無敵獎門人終極篇》前晚錄影第一集,重召歷屆8位獎老包括陳小春、錢嘉樂及阮兆祥等,因獎老王祖藍缺席,祥仔拿着他的照片扮車頭相,認真大吉利是!嘉賓方面,兩代巨胸尤物彭丹及孟瑤同場鬥性感,孟瑤激露4吋事業線稍勝谷胸丹丹。

前晚一集主力回顧18年來的精華片段及玩食壽司、拋波仔等遊戲,頗為沉悶,全靠兩女的半鹹淡廣東話增強笑料!

晒廣東話笑料多多

孟瑤在台上大讚TVB服裝「點扯都扯唔爛」,眾獎老即講有味笑話問:「邊個扯過?」孟瑤指着嘉樂說:「你冇扯過!」又稱節目令她「食(識)咗好多朋友!」彭丹則表示「好耐冇瀨(來)獎門人」,玩遊戲輸了後又說:「未開市(始)呀!」眾獎老即笑她:「玩咁耐美國都開市喇!」笑爆全場!至於洪天明與老婆周家蔚咀嘴晒恩愛,但被獎門人笑他周圍揀女最後揀了家蔚,令他頗尷尬。

在內地已是導演及政協的彭丹希望可幫到節目收視,但笑言不會做拱橋及一字馬,並說:「TVB從來冇人工畀我,唔係咁啱囉!」她透露年底將與荷里活男星兼導演賓艾佛力(Ben Affleck)合作講述中美抗日的大電影《B29情緣》,電影共投資逾6億港元,相當巴閉!感情方面,丹丹表示未揀定,希望另一半可理解她是藝術家及常到貧困地方探訪的生活模式。

志偉否認受命救亡

志偉強調今輯將是最後一輯,望可邀得張學友及王菲等重量級嘉賓,並否認因近期TVB劇收視低迷而受命救亡:「咁多年收視有高有低,TVB試緊觀眾口味,唔通好似韓劇咁,洗完米返嚟都睇得明咩!」

文:影視組