劉嘉玲唱入康城

劉嘉玲曾在1994至1996年內推出三張唱片，自此十多年未有新歌推出，近日她為與內地藝人陳坤合演、新進導演劉韻文執導的電影《過界》再次開腔，獻唱電影主題曲《終點的起點》，因影片入選「第66屆康城電影節」中「一種關注」單元的參賽電影，嘉玲可謂唱入康城！

貪口爽應承

嘉玲剛從台灣回港，昨日她在電話中接受訪問，表示將在康城時間本月18日在當地踏紅地氈。此行偉仔會同行，問是否當度蜜月？嘉玲說：「當係對我一種支持啦。」

談到唱主題曲，她自爆是一時口快才應承唱，事後大感壓力：「有諗過放棄，但喺導演等人支持下先膽粗粗唱落去！」因為熟悉角色能唱出主角內心感受，主題曲會在片尾播放，給予主角人生重新開始的感覺。

唱完有得着

嘉玲笑言老公梁朝偉亦未聽過此歌：「佢唔知，都唔諗住同人講。諗住到時喺康城電影播完出片尾時，有人睇到就睇，睇唔到就算。（同好友王菲、那英請教？）講都冇講！唔敢開口，最好冇人知。」不過嘉玲錄音後大有得着，發覺不論唱歌還是拍戲，只要真誠演繹內心感覺，別人會感受到，亦令她自信大增。至於有否信心在康城獲獎？嘉玲說：「接拍之前完全冇諗過會有提名，只想拍一套好電影！」她透露當初未有收片酬，只是想幫助新導演達成夢想：「後生時好想人畀機會，依家如果有能力都希望畀多啲機會人。」而最後她收取了象徵式的片酬。

文：專案組