樂仔冇影未來外父照撐
吳雨霏（Kary）與余文樂拍拖後，一度傳出Kary父對樂仔不滿，前晚Kary父親生日，身在外地的樂仔未能亮相生日宴，幸好獲「未來外父」出言力撐，直接粉碎不滿傳言，同時亦為兩人的戀情開綠燈。
向來獲富爸爸視為掌上明珠的吳雨霏，自從與余文樂拍拖後，有指因樂仔未有即時公開戀情，令Kary父相當不滿，但隨着樂仔和Kary戀情逐漸公開，加上多個月的相處，樂仔終於得到Kary父親的認同。
作狀咀媽咪
前晚Kary父親生日，Kary兩姊妹買定禮物約父母食飯慶祝，一家四口樂也融融。晚上八時，Kary和爸爸現身銅鑼灣，Kary大方透露爸爸生日，記者上前問樂仔會否一齊慶祝，當時兩人沒回答。
之後Kary翹住爸爸齊齊步入早前和樂仔往撐枱腳的大廈，未知是否食過翻尋味，今次重臨舊地和家人食飯。Kary與父親上樓後會合早已到場的媽媽及妹妹，一家人聚首一堂，食飯途中Kary上載作狀咀媽咪的一家三口溫馨合照上微博，並表示：「昨天（大前日）是母親節，今天（前日）是爸爸生日，沒有你們，沒有我，I Love You！」
Kary一家食了大約兩小時，至晚上10時，Kary媽媽和妹妹先步出，數分鐘後，Kary和爸爸亦離開，媽媽和妹妹由爸爸駕車接載離開，Kary則自行駕車走人。
父女同陣線
雖然余文樂缺席「未來外父」生日宴，但其後Kary父受訪時卻力撐樂仔：「以我所知樂仔唔喺香港囉！如果佢喺香港我都會邀請佢，再次重申我從來冇唔鍾意余文樂，總之個女鍾意我就鍾意。」為兩人戀情大開綠燈。而昨晚余文樂亦被網友發現身處德國機場，看來離港多日的他，已急不及待回港見女友。
文、攝：追蹤組