千嬅被指行得衰 慶爆
楊千嬅早前在北京不慎拗柴，導致韌帶撕裂，昨晚首次出席公開活動，依然冇有怕着上五吋高跟鞋，她透露腳傷後常被老公丁子高指她行得衰，要她重新學行路。
楊千嬅與老公丁子高、謝婷婷、琦琦、余思敏、莊思敏、Ana R.等昨晚齊出席手袋活動，千嬅穿上五吋高跟鞋到場，她透露腳傷已好七成，還有三成痛，已積極做物理治療，被問到點解仲着高跟鞋？她笑言：「着平底鞋好似冇着衫，我喺門口先換都ok，而且對鞋唔係好斜，上次跌親喺着斗零踭，喺後台又黑，老公都有叫我學行路，話我行得衰，遲早出事，我聽到都慶慶哋。」
想同紅姑合作
記者笑指她可與兒子一起學行路，她即笑說：「我一路有做gym，筋骨好好，意外成日有，今次嚴重啲。」昨日母親節，千嬅表示與媽咪與奶奶兩家人一齊食飯慶祝，而兒子現已不時發出似叫媽媽的音，千嬅說：「我當佢識叫媽媽，不過啲朋友話我有妄想症。」另有指《志明同春嬌3》中，鍾楚紅會加入與她爭余文樂，她說：「如果請到發哥同紅姑，我做乜角色都冇所謂。」
婷婷大讚姪仔
而謝婷婷前日出席姪仔Quintus三歲生日派對，大讚Quintus叻仔，還不時讚她靚女，她說：「Quintus大個一定氹死女仔，Lucas似爹哋（霆鋒），Quintus就似媽咪（栢芝）多啲。（栢芝點解唔去?）我唔清楚，（男友安志杰呢？）佢喺美國仲未返。」對於最近常傳兩人分手，婷婷透露兩人各有各忙，坦言已幾個月冇見，她說：「我哋感情我諗都ok，真係冇時間見，佢11日生日我有傳短訊畀佢。」至於感情是否淡咗？她即顯得猶豫說：「唔知。（冇以前咁好？）初初係蜜月期，之後變best friend。」
文：名人組