林德信及時行樂

「二撇雞」鬚good

提起歌手林德信（Alex），大家總聯想到他是「林子祥之子」，除了長相相似，更重要是他們都留有具代表性的「二撇雞」。不少「星二代」不想被定型，會盡量避免與父母形象太相似，Alex卻從不刻意避忌，懶理外間給予的種種枷鎖，只想「做自己」。

Alex笑言以「二撇雞」造型出道，並非為了加深自己是林子祥兒子的印象，只是單純地喜歡留鬚，加上林家上下所有男生均留鬚，可謂家族icon！而他留鬚的原因除了是「懶」還希望看起來成熟些，他笑說：「我入行之前真係好『呢啡』，可以成個月唔剃鬚！我全部舅父都留鬚，仲要係成面都係嗰種，得我爸爸一個係留兩撇。哈哈！可能呢樣都係遺傳。」

Alex與父親林子祥十足餅印。	有瑜伽教練牌的Alex每天都會做瑜伽。	Alex只想「做自己」，不理外間給他的枷鎖。

出街先化妝

如今「升呢」為明星，Alex承認入行後更重視外觀，變得愈來愈貪靚，除了定時剃鬚，還習慣了化好妝、set好頭，以最佳狀態外出見朋友：「如果出街唔化妝，總覺得差啲。同埋依家着重多咗皮膚護理，以前就咁沖涼就當洗咗面，依家一定會用落妝油。」連胞妹亦取笑他過分姿整：「佢成日笑我化妝仲多過佢、着衫仲colourful過佢！其實我以前一向都鍾意colourful，不過冇乜機會着，依家出騷就有藉口可以着得搶眼啲。」

Alex已把吸煙的惡習戒掉。

Alex與Alvin（右）合作，並擔任慈善相展模特兒。

人靠衣裝，但Alex強調自己貪靚是由內至外，為了時刻保持最佳狀態，他堅持每天最少做一小時瑜伽，風雨不改達七年之久。他深信有強健的體魄，便會心境開朗，自然人見人愛，他說：「我嫲嫲都係瑜伽導師，佢八十幾歲都仲好精神同開心。佢就算喺街度見到舊石都會笑，我咁大年紀嘅時候，都想好似佢咁！」

28歲活在當下

Alex因勤做瑜伽，令已有三、四年煙齡的他自動戒掉惡習，可謂一舉兩得：「自從做咗瑜伽，自己嘅身體就接受唔到煙，自然咁唔想再食。明顯身體好咗，同埋做其他運動都冇咁容易受傷。」他還坦言愛做瑜伽及熱愛音樂的女生會大大加分。

淡然對緋聞

一直以來Alex有不少緋聞女友，如歌手吳雨霏、松岡李那及姜麗文等，對於備受緋聞纏繞，Alex認為非他能控制：「我一向都同好多男、女朋友食飯、飲嘢、傾偈，只不過同男仔一齊冇人影。不過我唔會特登避忌，正常人都會有男女朋友。」父母看到他緋聞不斷，曾作追問並給予忠告，Alex說：「佢哋都覺得我多緋聞，話太多唔好。不過佢哋都做呢行，易啲了解，叫我小心啲咯。」

不過，Alex仍頻頻被拍得夜蒲，形象恐怕受影響，但他堅持依照自己的方式去生活：「我覺得自己OK，呢個係一個28歲嘅人應過嘅生活。應該趁後生有精神出去玩、出去識人，我諗過多十年，我唔會再想夜晚出去玩！」他不會理會傳媒對他的報道，本着個人宗旨，遊戲時遊戲，平時則保持均衡的生活習慣——做瑜伽及練歌。

熱心公益做型男

愛心爆棚的Alex一向熱心公益，為了幫助更多有需要的小朋友，他更與護膚品牌Kiehl's合作，擔任名人紅星慈善相展的模特兒。是次相展更由著名化妝師兼形象美容造型師Alvin Goh操刀，請來一眾亞洲型男紅星如任賢齊、吳尊、林峯、林俊傑等坐鎮，展示各人型格的一面。相展由後天（14日）開始展出，所有收益撥捐護苗基金。

採訪：龔凱欣　

攝影：沈健程　

化妝、造型：Alvin Goh

服裝：Vest：Karl by Karl Lagerfeld　Jeans：D2

Shoes：Pierre Balmain