JC有男護花無懼禁室培慾
轟動全球的美國禁室培慾案令人關注，生長在美國的「警鐘模」Jessica C.（JC）就坦言自己在美國居住時也常打扮性感，亦試過當街被撩，幸有男友護花貼身保護，因此不擔心成為目標！
「警鐘模」JC昨日以谷胸打扮出席慈善相集活動，同場並有Rosemary、邢嘉倩、陳嘉桓、楊愛瑾等。對於近日在美國發生駭人的三女禁室培慾案，受害人最終脫離魔掌，於美國長大的JC表示也有留意報道，替受害人感到難過，她說：「其實美國嘅女仔一般都着得好性感，所以真係要小心啲，（你喺美國會唔會着得好性感？）都會o架，通常會着背心同短褲，因為想着得舒服啲，（咁咪好易成為目標？）咁又唔會，最多都係喺街畀人撩，同埋我有男友保護，所以都唔擔心，但我都會叫兩個妹小心啲，唔好同啲陌生男人出街，我教佢哋有咩事發生就大叫！」
私下欣賞唔公開
同場的「宇宙最強」甄子丹太太汪詩詩就表示快將結婚十周年，早前她透露打算再拍一輯婚紗相，記者問她可會考慮拍全裸照？她笑說：「我OKo架，但老公就怕醜，我有同佢講過，但佢就鬧我，不過如果真係影全裸要準備吓，因為老公太fit喇！其實佢之前都拍過內褲廣告，但佢話依家小朋友開始大，所以唔可以再影呢啲，影係可以，但唔會公開。」
Mandy開心有人爭
而李玟就偕老公Bruce一起出席，她近日與內地男星黃曉明等一同為歌唱節目《中國夢之聲》擔任評判，對於曉明被質疑不是唱歌出身？她就力撐拍檔說：「佢係一個好全面嘅藝人，佢以前都有出過唱片，我哋每人嘅崗位唔同，大家合作得好開心！」另外，名模Mandy Lieu被拍得與外籍猛男夜蒲，對於被指與金剛一起「爭」她？她笑說：「有人爭都幾開心，不過我唔係咁濫，亦唔會玩一夜情，我好高要求要講feel！」
文：名人組