梁烈唯捱出頭靠胡定欣點醒
梁烈唯與胡定欣識於微時，二人曾傳緋聞但實是好友。星途上胡定欣比梁烈唯來得順暢，多得胡定欣的金石良言，令一度迷失的梁烈唯重新振作，才有今時今日的成績。
胡：胡定欣 梁 ：梁烈唯
閨中密友
胡：我同你拍《我的野蠻奶奶》時裝版時認識。最記得有次大家去跑馬地飲嘢，被傳媒影到就傳出緋聞。
梁 ：我哋嗰時仲行咗去便利店，見到出咗一款限量版避孕套，仲喺度指指點點，好在當時我無拎上手，否則就水洗都唔清。
胡：六年前嘅事啦。我記得仲有一次你幫我拎貓沙，傳媒又影到，報道話你係我嘅觀音兵。嗰陣時你都唔係咁多人識，得張圈頭圖片咋。
梁 ：係囉！其實你只係我閨中密友之嘛！
胡：係喎，仲要你女朋友Tina都係我Lower Form嘅中學同學！當日你介紹Tina畀我識，我眼都凸埋。我心目中嘅Tina點會同你拍拖，佢唔會揀你呢一類型囉。你成個花弗死o靚仔！
梁 ：唔止你，連佢阿媽都係咁講。當年佢阿媽話我哋最多只會拍到一個星期拖，結果我哋就拍咗十年。其實我追咗Tina好耐o架嘞，至今一日都無花弗過。
胡：直到工作上成日見到你，你會同我講Tina嘅嘢，我先知道你同女友相處之道，經歷咗好多嘢，好想快啲見到你哋拉埋天窗。呢幾年見你工作上一步一步向上，戥你好開心。
放棄自己
梁 ：你記唔記得，08年你同我講過一句說話。嗰年我第一次有電視獎項提名，雖然我無攞任何獎，但無失望。你仲行埋嚟同我講唔使灰心，你話「未到就係未到，到嗰時就會到」，呢句說話我一直記到今日。
胡：呢句說話我成日同自己講。但其實你2000年入行，我2002年先入行，你先係我前輩喎。
梁 ：以前我會覺得我行嗰條路好辛酸，無論幾努力都無人睇到，依家諗番其實係每個藝人都會必經。無經歷就無今日嘅我。「捱」嘅過程對一個藝人嚟講好重要，日後你先會珍惜。
胡：最辛酸發生過咩事？
梁 ：當年拍《上海傳奇》其實係唔夠騷得好緊要，公司仲要出信畀各大監製叫大家多啲用我。到開拍時有個製片叫我去服裝車自己拎衫，我上到車見到幾個藝人，佢哋問我「你上嚟做乜，乜套戲你有份咩？」我話我有份做債仔，佢就話「車尾有套衫寫住『債仔』係畀特約演員，咁應係你o架嘞。」嗰一刻我感覺到好似一刀插入心，好想喊。
胡：我比較好彩，讀完訓練班就做實習，一開始已經拍《衝上雲霄》做馬德鐘個妹。但套劇未出街前，我都係做啲行行企企啲角色，喺《皆大歡喜》仲同時做兩個角色。聽到你嘅經歷，我覺得自己好幸運，無遇到唔開心事，令到我更加珍惜。
梁 ：其實我放棄過自己一段時間。06年左右我覺得自己喺電視台無乜機會，反省自己係咪唔適合喺電視圈。之後我跟朋友喺夜店打碟維持生計，做埋駐場一做就九個月，但後尾發覺夜生活令到自己無晒生機，個人好灰無晒路向，跟住我同個天講，如果畀多次機會我返入電視台，我會好認真咁做。點知個天真係聽到，公司搵我返去拍《尖子攻略》。
胡：我有時喺工作上遇到好多問題，都會迷惘唔知點再行落去。我唔開心係覺得自己能力出現問題，我會問點解呢個工作唔係我做嘅？最終我明白等待機會係基本步。娛樂圈係一個長途賽，無人知機會幾時嚟。但你決定咗要參賽玩落去，你就要畀心機去做。
捱窮死撐
梁 ：當年返咗公司開劇，為咗繼續做落去我知我要練大隻裝備。因為我無錢，但我堅持每個月出糧我先交健身會費用，因為可以去沖涼、睇雜誌。每個月一出糧我就去超市買定啲米紛、即食水餃等糧食，最少一定有嘢食。
胡：係真o架。早排佢話要同公司傾調整合約，打畀我問我意見，我先知佢當時月薪有幾多。我第一個反應「吓？你講真o架！」無諗過會係一個咁嘅數字，我反問佢「你平時點生活o架？點慳點唔用錢，你都要生活o架……」
梁 ：以前同事約食飯，因為無錢我唔敢去。最遺憾陳國邦同羅敏莊結婚請我去飲，我同佢講我要去開工去唔到，其實係我無錢做人情，我嗰日仲要失蹤怕畀人搵到。又試過胡杏兒開完迷你演唱會慶功，我有去但無食嘢，心諗我無食嘢無人會叫我夾錢啩？
胡：你舊烏雲依家過咗，我唔使再為你擔心嘞。
梁 ：仲有呀！好耐之前我有問過張智霖畀着過嘅舊衫我。佢話佢着過唔係咁好意思，但我話無所謂，總好過我出席活動無衫着，真係要好多謝佢！
胡：繼續向前望啦，我希望再做好啲，有多啲發揮機會嘅角色，獎就唔諗咁多住嘅。
梁 ：我就希望有多啲工作，有幾多做幾多。我可以唔使瞓o架。
後記
胡定欣與梁烈唯肯定不是情侶，而是一對很交心的好朋友。訪問期間，二人對對方的事情瞭如指掌。問到對方過去，總喜歡搶答，而且快而準。訪問過程笑聲不絕，不會感到二人打情罵俏，卻見他們頂撞鬥氣。
文：影視組