羅艷卿「鴿鴿聲」回歸
粵劇大老倌羅艷卿、吳君麗、譚倩紅、薛家燕、尹光等昨晚出席《香港粵樂曲藝總會創會聚餐》，年過80歲的羅艷卿神采飛揚，保養得宜，她說：「我美國返嚟香港幾日，唔走o架喇。（想唱曲？）我太老喇，『鴿鴿聲』，私下有玩嘅，登台就唔好，怕為難觀眾。（有乜養生之道？）做吓運動，最緊要心境開心。」吳君麗則笑言閒時到社團唱曲，問到TVB有否邀請她同胡楓再拍劇時，她說：「冇喎，戲癮呢樣嘢好睇情緒，加上修哥（胡楓）又係大忙人。」
至於譚倩紅帶同徒弟謝國璋出席，她說：「呢個徒弟跟咗我4年，我哋識好耐，收佢做徒弟都係機緣，就好似我跟任姐學嘢都係緣分，徒弟6月有演出。我仲有個23歲女徒弟，依家喺加拿大讀博士。」而家燕姐則清減不少，她說：「我為咗身體檢查而控制飲食，check咗冇事，放心晒！」
