岑麗香楊怡 浮誇扮friend
最近宅男女神岑麗香被指介入楊怡與羅仲謙之間的感情，兩女日前同場拍劇，不但沒有面左左，反而搭膊勁friend，兩人直斥傳聞無聊，楊怡更笑言不介意與香香搞同性緋聞。
無綫視后楊怡、岑麗香、吳啟華、蘇玉華及朱千雪等日前到深井拍攝劇集《On Call 36小時2》，眾女在沙灘玩波大晒活力，可惜打扮密實沒有性感畫面！最近有傳楊怡緋聞男友羅仲謙對香香愛護有加，但見兩女毫無芥蒂，依然有講有笑。
專登調位同坐
榮升女神後的香香緋聞不絕，幾乎冧盡所有男同事，她表示感到無奈：「唔覺佢哋對我特別好，可能因為我O型血惹蚊，大家先黐埋嚟。（同謙仔嘅緋聞？）好無聊！完全唔覺有咁嘅事，我同楊怡依然好好感情，之前出trip我仲專登調位同佢坐。」楊怡亦表示與香香勁friend，問到會否叫謙仔與香香保持距離？她搞笑說：「我會叫香香黐我多啲，不如我哋傳緋聞啦！」期間香香走向阿怡，兩人攬頭攬頸又作狀錫錫，果然「friend到冇人有」！劇中楊怡與小演員表現合拍，但她再表明沒有計劃生BB：「隨緣啦！（有意外點算？）咁大個人點會有！」
叫雯女唔好嬲
至於吳啟華與蘇玉華在沙灘漫步，問到現實中可曾帶另一半浪漫行沙灘？啟華搞笑說：「唔止老婆，之前都帶過好多個！」阿蘇亦自認浪漫主義，喜歡跟情人漫步沙灘。對於鄧萃雯斥《金枝慾孽貳》沒有劇本，啟華叫對方睇開啲不要太執着：「我都慣晒飛紙仔，冇咩大不了，唔好太嬲，否則對件事仲唔好。」
此外，朱千雪表示會叫兩位妹妹選港姐，問到兩人年齡，千雪竟然記錯，非常爆笑：「因為角色年紀大過自己兩年，我連自己幾多歲都撈亂咗！」
文：影視組