三哥接力低B劇吸觀眾
劇情玩高深，觀眾高呼睇唔明的劇集《金枝慾孽貳》，上周收視跌至19點。而由苗僑偉主演的新劇緊接《金》劇播出，他笑言新劇易明能氹番觀眾，更豪言若新劇收視低過20點，會反請梁乃鵬食飯請罪。
萬眾期待的無綫劇集《金枝慾孽貳》播映後口碑與收視雙失，上周平均收視跌到只有21點，最低收視點更跌破二十大關得19點，實在是重頭劇少見，最高收視點也只有24點收視，無綫還接獲觀眾5宗投訴劇情沉悶。
唔收得請食飯
由苗僑偉（三哥）和萬綺雯主演的劇集《好心作怪》將於六月初緊接《金》劇播出，昨日兩人返將軍澳電視城拍宣傳照。
提到無綫似想靠「福將」三哥救亡，他說：「唔好講救亡，我驚救唔到喎！沖淡吓啦！係咪計錯數呀？TVB有慣性收視，九點半劇唔會去到21點，真係奇怪，《金枝貳》又咁大卡士。」他又非常識做力撐《金》劇：「《金枝貳》咁創新係想刺激觀眾，唔啱口味咪檢討囉！睇番《好心》冇事喇！我嗰套好低能，我嘅角色低能又搞笑，又易明、娛樂性又豐富，可以令觀眾開心番！」他又豪言若《好》劇收視低過20點，會反請無綫行政主席梁乃鵬食飯請罪：「如果係咁，我會同佢講對唔住，係演員做得唔好。」
讚蚊蚊係福將
三哥又讚萬綺雯（蚊蚊）是福將，蚊蚊聞言即說：「三哥先係，有大食大，收視睇天時、地利、人和，拍嗰陣已經做好本分，結果就預計唔到。」此外，無綫外事部發言人表示會加強《金》劇宣傳，下周會再舉行宣傳活動谷劇。
文、攝：影視組