歌手陳鈺芸（JuJu）稍後將為一頒獎禮任司儀，昨日她到中環試衫，並挑選了一套低胸晚裝，又大爆走光瘀事：「嗰時喺夏威夷學滑水，因為即興去學，所以係着住bikini，點知一個浪衝埋嚟成個top飛甩咗，到男教練擰歪面我先知，仲要喺水入面自己搵番件衫！」
JuJu又指7月將代表香港到保加利亞參加跆拳道世界賽，她表示信心十足：「依家日日都會練4個鐘，所以搞到手手腳腳都損晒。我都係第一次參加，但希望可以為港爭光。」
