子珊瘦色可餐襯番子華

「笑匠」黃子華繼4年前劇集《絕代商驕》後重返無綫，接拍文偉鴻監製新劇《My盛Lady》（暫名），昨日子華聯同拍檔徐子珊及陳嘉佳（細細粒）於馬鞍山開工，起初只拍攝兩女對話戲份，劇情要求分量十足的細細粒，談至興高采烈時一手把瘦蜢蜢的子珊攬入懷中，令子珊喘不過氣不停咳，場面惹笑。

達明身痕唔停得

劇中專為剩女免費找歸宿的子華，透露會貫徹以往討厭角色，對於拍檔子珊為迎合他刻意減磅，子華謂：「全TVB、香港嘅女仔都好瘦。（佢驚你抱唔起佢？）放心，我除衫之後二頭肌都好驚嚇，係小肥仔一名，瘦骨仙但有肚腩，都幾難練到。（再拍TVB劇擔唔擔心捱唔到？）4年捱一次唔緊要。」

黃子華相隔４年回歸無綫開工。

細細粒用力攬住徐子珊。

談到早前被本報拍得與抗癌成功的老友張達明等聚會，子華指達明身體狀況向好：「佢仲飲得下酒，戥佢開心。（TVB搵你出面叫達明返嚟客串？）等佢身體再好啲做咩都得，我想佢完全康復先，依家就略瘦。（達明有冇身痕想返幕前？）佢個人唔停得，而家做緊幕後工作，充滿精力呀！」

細細粒減磅嫁人

而與子華首日演對手的子珊則大呼好玩，她笑謂：「比想像中輕鬆，可能未到沉重部分，見到子華咁弗我都驚。（頭先同細細粒相擁有咩感覺？）好舒服，佢好得意，喜劇嚟講佢係我前輩添！」

至於細細粒就直言與兩位前輩合作，緊張得未能入睡，更指看劇本後希望減肥，有意於3年後實行，還笑言要視徐子珊身形為目標，她謂：「一係唔減，一減就要好瘦，咁就一定嫁得出。」將與王浩信於新劇演情侶的她，笑指大有機會有咀戲，笑言「諗起都尷尬！」

文：影視組