張敬軒月租十萬豪住文物屋
歌手張敬軒近年愈住愈富貴，最近更「升呢」由中區半山豪宅遷住摩星嶺近四千呎、建於1922年三級歷史建築文物別墅，每月豪擲逾十萬元租金之外，還要繳交五位數文物保育費，難怪他表示為了豪住「文物」，一於要節衣縮食。
近年密密搵銀、愈住愈豪的張敬軒，早前秘密搬到位於摩星嶺的「福利別墅」，新居別具一格、大有來頭。文物屋建於1922年，採用古典復興式及西式建築風格，部分是香港大學的教授宿舍，屬三級歷史建築，文化氣息濃厚。早前軒仔便招呼一班好友包括同性密友關智斌（Kenny）、黃秋生和詹瑞文前妻甄詠蓓等，在他的連花園約四千呎的新居聚會，當時更上載聚餐照到微博。
搞足兩年
連日來於新居出入的軒仔，日前由司機接載下乘七人車離開寓所前往上環碼頭到澳門工作，至前晚軒仔又被拍得由司機接載到金鐘晚飯，期間司機更代他拿了不少衣服往新居。對於豪住月租逾十萬元的文物別墅，記者致電軒仔時他大方承認：「兩年前已經睇中呢度，不過租金實在太貴，由睇樓到成交都用咗兩年時間，咁啱之前中環間屋又約滿，人生點都要豪一次，所以先決定租。（月租十萬？）係啊，不過睇中呢度環境清幽、人傑地靈，自己又支持保育，可能因為佢個背景，我作歌靈感都多咗。租金咁貴，令到我有好大推動力作歌，增加收入幫補吓。」
節衣縮食
軒仔還說要變賣雜物、停租迷你倉來幫補租金：「所以打算租一年咋，依家仲要節衣縮食。其實住呢度都要謹慎啲，因為揼粒釘都要向大學申請，加上上網得8Mb『龜速』，附近鄰居九點幾就開始瞓覺，自己都要靜啲。」屋內有個十四呎英國式火爐，是他的至愛：「夠懷舊，文化氣息又濃烈，我覺得間屋唔襯電視機，所以第一次屋企係冇電視o架，好似時光倒流咁！連黃秋生都有興趣嚟借住。（叫Kenny幫手分租？）佢冇表示呀。」
曾到訪軒仔新居的Kenny大讚軒仔新居好靚：「我最鍾意個花園同十四呎英國火爐。」提到租金逾十萬時他驚訝的說：「乜咁貴呀？佢冇同我講，佢都發神經，咁貴！我就唔捨得啦，邊有佢咁有錢。（軒仔租屋前有冇同你商量？）冇呀，都唔關我事。」
文、攝：追蹤組