又南恨結婚 努力搵銀

Shine出道十年默契十足，問到相識多年的二人，覺得對方有何轉變，或值得欣賞的地方？黃又南率先搶答，大讚拍檔徐天佑堅強：「我哋綵排嗰陣，天佑屋企發生咗啲事（天佑父親去世），但佢都好硬淨，好堅強；我哋超乎兄弟嘅關係，當然嗰陣時我都有打電話畀佢，但始終都要靠自己，佢休息幾日就出番嚟繼續工作，我覺得呢樣嘢係值得學習，唔係個個都做到，為佢而感到驕傲。」而天佑認真思量後說：「佢多嘢講咗！佢係愈嚟愈多嘢講，好似的士司機咁！」身旁的又南聽罷即哈哈大笑。

從未試過吵架

他們坦言會因公事而意見不合，但從未試過吵架：「我哋唔會嗌交，因為我哋有個法官經理人，最後會交畀佢話事。」問到單身的又南可會恨拍拖？他直言：「恨o架！覺得有時有女朋友支持會開心，亦會影響我嘅工作，令我做得更好！」又南自言是保守的人：「我會係寧缺勿濫，一定要了解咗先，唔可以傾兩句就即刻撻着，我接受唔到！」他並言有幾年曾為屋企還錢，令他明白到拍拖都要先有穩定的生活：「我仲好恨結婚o架，不過唔想老婆去捱，所以依家就努力做嘢，有好機會一定要先把握！」

大談開騷點滴

提到其個唱反應叫好又叫座，最近還推出DVD，Shine憶述開騷時的點滴，天佑自爆初踏台板綵排時攰到差點暈倒，二人並言：「實踐咗十年係紅館開騷嘅夢想，希望下次可以挑戰十幾場，同埋可以開四面台，好想試吓嗰種感覺！」問到DVD中可有收錄花絮片段？天佑說：「冇特別一個花絮部分，但歌與歌之間就會有一啲我哋上台前嘅片段，好似我哋出場前互相鼓勵咁，我地仲每人寫咗一篇同大家講嘅說話。」

採訪：音樂組