葉翠翠壓力爆煲暴瘦十磅
葉翠翠首次飾演奸角壓力太大，結果暴瘦10磅，失眠又吃不下的她更要找中醫開開胃茶治療，對於被批評「讀對白」，她看得開謂大家已經好「仁慈」，亦不會因此被打沉，有人留意反而值得高興！
港姐出身的葉翠翠有份參與《金枝慾孽貳》演出，接拍此劇的不少演員都坦言壓力大，鄧萃雯有情緒病、伍詠薇亦深感壓力而有影響，首次參與《金枝》的翠翠不諱言獲知有份演出時十分開心，但到真正拍攝後，竟因過大壓力而暴瘦10磅之多！翠翠坦言：「嗰陣壓力好大，食唔落嘢又失眠，瘦到好犀利，我睇咗幾次中醫，中醫開咗啲開胃藥畀我，之前從未試過咁樣，拍呢套劇係我入行以嚟最大壓力，可能第一輯嘅影響，大家都抱好大期望，自己都畀好大壓力自己。」翠翠表示於橫店拍攝時，每個演員一有空都只是讀劇本，大家很少聊天，可見每個演員所受的壓力有多大。
只給自己50分
談到劇集出街後，不少批評指她只「讀對白」般，翠翠不諱言自己背劇本背到崩潰：「其實我覺得已經寫得好仁慈，我自己都覺得做得唔好，嗰日同朋友食飯，佢同我講『第一集我唔知你做乜，又唔知你講乜』！」加上劇本是演員臨場才有（俗稱「飛紙仔」），翠翠少有演古裝，亦首次做奸角，故她坦言自己根本拿捏唔到：「我畀自己50分，可以再好啲，講真，我有問過可唔可以重拍，但冇咁嘅時間。」
付出120分努力
翠翠之後接拍的是民初劇《守業者》，說到《金枝》評語及收視一般，會否被今次批評打沉？她謂：「唔會，從來冇諗過收視好唔好，剩係諗要做好佢，拍時自己已付出120分努力，但冇辦法。不過，我覺得有人批評即係有人睇，雖然畀人話讀對白，但唔緊要，最緊要有人肯講、留意自己。」
採訪：影視組
攝影：沈健程
場地：Zummer（QRE Plaza）