Fiona Kary 助童夢實現
薛凱琪（Fiona）與吳雨霏（Kary）可謂善心爆棚，日前為慈善機構拍攝宣傳照，Fiona透露私下與母親孖住到狗場做義工，Kary則希望有朝一日能圓夢，成立個人基金幫助小朋友，並大讚男友余文樂善心同樣爆棚。
Fiona、Kary及黃宗澤日前為麥當勞之家拍攝宣傳照，三人與患病小朋友打成一片，有小朋友主動摸Fiona的面，氹得她傻大姐上身哈哈大笑，剛在台灣拍攝新歌MV返港的Fiona說：「好多時拍完MV啲裙都攞去慈善拍賣，私下同媽咪都會去狗場做義工。」問她有否考慮成立個人基金？Fiona說：「想，但要好盡心盡力去做。」
探訪總有得着
Fiona坦言每次去完探訪總有得着：「雖然我眼淺，但流嘅淚係感動，返到香港落差好大，藝人好多時都受困擾、唔開心，但諗番起探訪情景就覺得唔開心嘅嘢係好渺小。」Kary承認曾與爸爸提議過到內地興建學校，她說：「有同爸爸傾過，唔係平與貴問題，起完要運作。」
讚男友有善心
Kary表示有想過成立個人基金，她說：「呢個係其中一個夢想，有一日可以成立義工團隊或者基金，我知係好長遠計劃。」問到會否叫男友余文樂一齊做慈善？Kary說：「我知佢自己有做，做善事係自發性，唔需要吓吓講出嚟。」
文：音樂組