周志文考牌肥佬嘆冇運

無綫「巨聲幫」大孖周志文昨日現身沙田駕駛學院,揸棍波貨Van考車牌,考完後「大孖」望着「肥佬」的成績單自嘆冇運:「我抽中咗平時學車冇得學嗰條路線嚟考,仲要撞正整路,後面又有快車要過我,冇得一次過pass,我好失望。之前學咗十幾堂,我對自己駕駛技術好有信心,抽到呢條路線算唔好彩,惟有盡力去考呢條未行過嘅路線。」

教車師傅亦有安慰「大孖」,讚他其他部分做得幾好,下次再努力。周志文惟有寄望下次再考:「我希望抽番呢條路線,證明畀人睇,我係憑實力考個牌返嚟,我係得嘅!」