伍詠薇認事實：舊聞當新
藝人伍詠薇因劇集熱播而新聞多多，有報道指她曾加入黑社會、做「小三」及吸食大麻，昨日她回應表示這全是事實，但報道只是「翻炒」以前的專訪輯錄而成。對於她開房P沒預鄧萃雯，她指雯女很多工作，好鬼忙！
伍詠薇（伍姑娘）、鄧萃雯（雯女）因話題性劇集《金枝慾孽貳》而成為新聞人物，昨日更有報道指伍姑娘自爆曾吸大麻、加入黑社會，更做過「小三」。對此，昨日她在電話中表示全部都是事實，不過內容都是以前做訪問時說過的，她說：「個記者打嚟，問我係咪咁樣咁樣，當時我開緊房P，仲開咗speaker畀啲姊妹聽，佢哋只不過將全部以前嘅訪問輯錄埋，根本我冇同佢哋做專訪。」
跟雯女冇不和
對於有指伍姑娘與劇中宮女「姊妹」感情深厚，開房P都沒預埋劇中死對頭雯女一份，更因風頭蓋過雯女令二人內訌，對此伍姑娘坦言雖然與雯女關係不及與其他宮女「姊妹」，友誼不太深，但絕對沒有不和，她說 ：「第一次開房P原本都有請雯女，但佢實在太忙冇嚟，雯女好多嘢做，真係好鬼死忙。其實大家唔好諗得咁複雜，邊個得閒咪邊個嚟，不過我同一班宮女拍攝時真係種下情根，我同佢哋都玩得好癲，拍時真係冇乜機會同家姐（雯女）咁多接觸。」
伍姑娘又強調開房P不是她出錢，笑言自己多朋友、人緣好，被稱為「福利官」，都係「搲」sponsor。說到她人紅多新聞，她笑謂：「預咗，一定係咁！最緊要幫到個劇。」
叫到宣傳就做
談到雯女日前寸爆指無綫沒預她拍宣傳片及懶理收視，伍姑娘說：「我聽唔到佢講時真正嘅語氣，公司叫宣傳，我哋會盡量配合，我都係拍前一日啱啱落機，本來約咗客傾嘢，公司叫到咪推咗個客盡量參與囉！呢個係team work。（話你風頭太搶，令雯女不滿。）唔會啦！大家係成熟演員，有深度。」
文：影視組