霍震霆聞做爺爺笑得燦爛
跳水王后郭晶晶去年下嫁奧委會會長霍震霆之子霍啟剛，近期她出席活動時都穿上寬衣，並見她腹部隆起，疑有身孕。霍震霆前晚出席《第四屆全港運動會開幕典禮》時，被傳媒追訪，適逢有小朋友邀霍震霆合照，記者隨即問他是否就快做爺爺所以笑得咁開心？他說︰「有少少笑容啦。」對記者一連串問題，包括是否未夠三個月唔講得？幾時知道喜訊？會是男孫還是女孫？霍震霆只有一個答案：「打電話去問我個仔啦。」當再問他為何做爺爺都唔講得？他講了一句︰「多謝關心。」
而當晚表演嘉賓李克勤就為囝囝過分曝光而煩惱，他對記者說：「唔該手下留情，放過我個仔啦，我有剪報習慣，近日發覺個仔中招比率相當高，上校外課程都畀人影，我兩父子畀人影嘅同時，唔願意出鏡嘅家長都上埋鏡，唔該，想要相我去影，影完再send畀你哋。」對於譚詠麟兒子被爆報讀牛津，李克勤說：「呢位朋友已經好頭痕，仲好有微言，前輩嘢唔想講。」
