丁子高驚喜P 色惑千嬅
楊千嬅與老公丁子高結婚後，已甚少過二人世界，大前日丁生丁太狠撇兒子，一同過澳門睇「Taboo色惑」騷，誰知騷後才是「戲肉」，丁子高安排了一個驚喜派對送給千嬅，被蒙在鼓裏的千嬅，突然見一班好友現身派對，開心到差點喊出來。
早前千嬅入院割除纖維瘤，丁子高因擔心病菌多，故下令不准老婆出街，近日見千嬅身體已康復，而且她的一班朋友已很久無見千嬅，故為氹老婆開心，及補祝千嬅奪金像影后，丁子高秘密約了千嬅一班好友，為數三十多人，一同到澳門開派對。
事前瞞住千嬅的丁生，為製造驚喜，只是跟千嬅說一同到澳門新濠天地睇「Taboo色惑」騷，昨日丁生說：「千嬅睇時緊張到嘩嘩聲，完騷後有幾個演員Lucky Hell（吞劍紋身女郎）和Talia（舞藝女神）知道佢係藝人，仲落台同佢影相，（千嬅最鍾意睇邊個演員？）佢最鍾意Lucky Hell同女歌手Cassie Mclvor，Cassie歌聲好似海豚咁美妙，（Cassie Mclvor同千嬅比邊個啲歌唱得好聽啲？）唔同嘅，千嬅講嘢都好好聽。（鬧你時都咁好聽？）佢唔會鬧我。」
年尾先造人
完騷後，丁生建議與千嬅一起唱卡拉OK，千嬅打開房門發現房內全是她的朋友，才知道是為自己開派對，即時感動得差點喊了出來。問丁生是否批准老婆飲酒時，他說：「一杯咁多啦，其實佢身體好番好多，已經開始做番運動，（你要罰千嬅年尾生仔，有冇順道喺澳門造人？）梗係無，佢今年咁忙，拍完戲先啦，等年尾先，我都好忙。」
文：名人組