薛凱琪 盛女愛忠佬

真的假不了

我知道做藝人要小心言行，但我覺得不可以每件事都好小心，這樣做人會好辛苦，太小心做人會好假。我不是衰人、大奸大惡，或者要遮掩同瞞住好多事，我覺得做人要適量地去真，自問太假我都做不到，就好似拍拖都不是一個壞形象。依家個個都求真實，我幾鍾意香港娛樂圈的趨勢，開始像外國般，外國明星好cool，拍拖行得紅地氈就大方拖手，分手就拖第二個，結婚就結婚，生仔就生仔。其實明星都是人，以前香港人睇明星拍拖好似好大件事，到你換畫又係大事，但從這幾年結婚潮開始，大家好似終於知道藝人都會結婚，拍拖都會散，如果依家我有伴侶，我覺得大家可以長久的話，我都不介意公開。

憎人講大話

其實我都不想大家成日覺得我好似好dry，我覺得這個形象有少少奇怪，並非一件好事，我不認為單身冇拍拖可以保住我形象。做人應該人性少少，拍拖對象不合適當然要分手，要搵到一個好男仔是很難的，我不認為自己要求高，但我的要求好難找到。我好憎人講大話，單單要找個不說謊的人已經夠難，我們做藝人的生活圈子好窄，基本上我沒有甚麼機會認識陌生人，我大部分朋友都是工作上的同事，平日難得有假期我自然想跟自己喜歡的朋友一起聊天，所以認識新朋友的機會是零。

薛凱琪曾大方請兩位緋聞男友方大同及房祖名到其音樂會做嘉賓。	薛凱琪自言不着重物質，寧願揀個忠誠又普通的男友。	方大同與薛凱琪經常有音樂上的合作，因而傳出緋聞。

拒戀富二代

如果可以選擇，我希望找個圈外男友，因為感覺會比較簡單，但感情事根本不可能任你揀，你愛就愛，我拍過好幾次拖，從未收過好貴重的禮物，連名牌袋都沒收過，可能以前的男友都知我個性，我不着重物質，不需要好豪華的生活。我不是歧視富二代，只是覺得這個世界太多誘惑，即使我信得過男友，但未必信得過世間的誘惑，如果有兩個男仔同時追求我，兩個都是好男仔，但一個有錢、一個普通，我寧願揀普通那個，感覺上比較有安全感。

盼報答父母

每個人對生活的要求都不同，如果我拜金又何必做得這樣辛苦？可能我是家中獨女，希望可以給予父母穩定的生活，不用他們擔心。記得媽咪曾經說過：「雖然生你嘅時候屋企冇咩錢，但如果畀我再揀過，我會選擇生多個，起碼有咩事，你都有個兄弟姊妹分擔。」既然個天給我機會，可以努力時我就努力工作，這也是對父母的一個責任。所謂退休享受人生，我依家又不是在地獄，我都一樣享受人生，只是我沒有太多時間去玩，因為我正為自己的將來而努力。

變態獨生女

我好鍾意BB同小朋友，但又好怕痛，每一次M（月經）痛我都同自己講我不生仔，哈哈！因為自己是獨生女關係，細個時有少少心理變態，我會自己玩公仔，同公仔說話，有時扮老師教他們，有時玩買賣遊戲，自己賣、自己買、自己退貨、自己投訴。好多小朋友會玩結婚、玩煮飯，但細個時爹哋媽咪管得好嚴，不會讓我出街，所以我就同自己玩。

諗定點教仔

將來我有小朋友，未必會管教得太嚴，其實管得嚴有好有不好，因為我明白小朋友總有長大的一日，到你管不到他的時候，放他出去這個世界，他可以變得好壞。

後記：爛gag氹得人

之前我有首歌《冷笑話》，好多人知我鍾意講爛gag，你以為我不知自己的笑話不好笑，點解我都要講？都是想氹大家開心，世界就是需要這種人。可能你會當這種人是小丑、配角，但他的目的都是想大家開心，如果個個都想做梁朝偉、張曼玉，就沒有人想做諧星。我不是說我想做諧星，而是等同做人態度，我會繼續講我的爛gag，我會堅持，因為這個就是我。

口述：薛凱琪

筆錄：音樂組