樂仔愛Kary制服誘惑
憑拍電影結緣而成為好友的楊千嬅和余文樂，前晚齊齊以代言人身份現身服裝店開幕活動，樂仔笑指千嬅打扮十足「學生妹」，但表示不介意女友吳雨霏（Kary）作這種打扮，又說正幫Kary融入自己的朋友圈。
楊千嬅和余文樂自電影合作取得空前成功後，前晚再以螢幕情侶檔的姿態現身《UNIQLO全球旗艦店開幕派對》，並任開幕嘉賓，兩位香港單車手李慧詩和黃金寶亦有撐場。
搞爛gag示愛
千嬅與樂仔見面即密密傾，細聲講大聲笑，以黑白學生look現身的千嬅甫上台，樂仔即大叫：「嘩！學生妹呀！」千嬅亦不輸蝕，即回敬他：「鍾意我送一套畀你，等你返去日日對住。」千嬅又說老公丁子高向來喜歡她作如此簡單打扮。
問樂仔覺得女友吳雨霏（Kary）可適合作學生打扮？樂仔即大搞爛gag：「唔係人人都carry到，但Kary就carry到。」不過，樂仔坦言自己對學生look感覺麻麻，問到喜歡女友作甚麼打扮？他說：「佢咩look都得啦。」
早前有報道指郭富城跟熊黛林（Lynn）分手的原因之一，是Lynn融入不到城城的朋友圈子，身為城城好友兼「火鍋腳」的樂仔對此表示，近來工作忙，很少見城城：「我哋平時唔會講呢啲，只會關心大家身體好唔好，工作開唔開心。」樂仔亦坦言沒接觸過Lynn。千嬅此時再度搭嘴：「你啲朋友鍾唔鍾意你女友呀？」問題一出即時KO樂仔，令他只能以笑遮醜，並稱：「你條問題問得好，融入緊o架喇。」
搵紅姑做情人
另外，有指導演彭浩翔有意邀請鍾楚紅在電影中演樂仔媽媽，但早前紅姑已表示興趣不大，樂仔亦稱：「紅姑應該可以做情人，如果係就好，不過都係等導演傾同安排。」
文：音樂組