基仔谷麒麟臂殺入美國
古巨基將於美國時間27日晚在大西洋城舉行巡迴演唱會，明日起行的基仔完全無懼之前波士頓發生的恐襲爆炸案，雖然大西洋城鄰近波士頓，但基仔說：「冇擔心過，行程好早就安排好晒，不過去到我都會同屋企人報個平安，等爹哋、媽咪安心。」由於行程緊密，基仔想申請多幾日假都不獲公司批准，他說：「完騷後都係留多一日，同啲品牌傾合作。」
獲准放縱吃喝
基仔連日來忙拍廣告以及為巡唱排舞練唱，每日做足十四個鐘，昨日他穿上豹紋衫褲排舞，基仔笑說：「雖然係冇跳一排，但同班dancers一埋位跳，手腳自動生猛晒，好自然就記得晒啲舞步。」基仔笑言在跳舞方面愈來愈有天份。不過基仔就被健身教練投訴他瘦了，因為要谷番對「老鼠仔」麒麟臂出來，基仔獲准放縱地大吃大喝，他笑說：「我呢排狂食肉同蛋白，跟教練一操老鼠仔就現形。」
向張國榮致敬
今次在美國巡唱，基仔也特別加設一part向已故的巨星張國榮致敬，他說：「今年係哥哥逝世十周年，所以同導演傾過，想做一part紀念哥哥，我揀選咗三首哥哥嘅歌《追》、《今生今世》及《由零開始》。」
文：音樂組