伍姑娘興起拖金枝女開房

9年前《金枝慾孽》的宮廷鬥爭深入民心，《金枝慾孽貳》前晚終於首播，新一輯的女主角人面全非，由佘詩曼、張可頤換上蔡少芬及伍詠薇，惟「如妃」鄧萃雯繼續支撐大局，觀眾對該劇的評價好壞參半，難怪第一集收視一般，平均只有25點收視，最高也不過是26點。

一貫好戲的鄧萃雯獲網民讚賞，蔡少芬也夠壓場感，但卻批評劇集節奏慢，首集出場角色太多令人混淆，還狂插葉翠翠演技差對白講得太急，與蔡少芬演對手戲時即高下立見；苟芸慧的廣東話繼續被人詬病，網民指要邊看字幕才能明白。

陳豪帶外賣食飯

前晚該劇眾演員相約到佐敦某酒店唱卡拉OK睇首播，包括伍詠薇、陳豪、黃德斌、關禮傑、苟芸慧、簡慕華、葉翠翠、監製戚其義等，陳豪到場時竟自備外賣飯盒，問他原因時只是傻笑，黃德斌則為他解圍：「佢忙吖嘛！」眾人玩到凌晨3時，帶醉相繼離開，但伍姑娘與簡慕華、苟芸慧、梁嘉琪等卻轉到酒店大堂，伍姑娘向記者鞠躬說：「我哋今晚唔走。」原來伍姑娘早準備好酒店房讓「金枝女」繼續在酒店房「過夜談心」。

黃德斌大受異性歡迎，齊齊耍功夫。	陳豪離奇自備外賣去食飯。	葉翠翠遭網友插講對白過快。

葉翠翠發炮太急

伍姑娘昨日接受電話訪問說：「大家睇完首播，一班女仔就上咗酒店房瞓喺床度繼續傾偈。（尋晚你請客﹖）唔係，係酒店朋友贊助嘅，我只係做福利官幫大家爭取。（雯女冇到？）佢應該要做嘢，因為都約得幾急，希望佢下次可以出席。（網民彈劇集節奏慢？）呢套劇要煲吓嘅，大家唔好咁快下定論，唔好咁心急。（只得25點收視？）差唔多，我都滿意自己演出。（葉翠翠和苟芸慧演得差？）我覺得佢哋演得好好喎。」至於被網民狂插的葉翠翠接受電話訪問說：「可能呢套劇要鬧人，有時講對白快咗，嚟緊自己會加緊留意，仲有進步空間嘅。」

文：影視組

攝：追蹤組