名人街頭表演任人睇！出名夠man又顧家的曉積文前日與家人外出時，一邊拖狗一邊將細女「fing起」，另一邊廂珍妮花嘉娜就派出好動的大女表演「用埋塊面夾公仔」，名人之後果然表演欲強！
一向顧家的曉積文（Hugh Jackman）雖然不時忙住拍戲和健身keep fit，但他亦常被拍到閒暇時大歎家庭樂！他前日就與太太Deborra-Lee Furness湊一對仔女Oscar和Ava於美國紐約街頭散步兼放狗，左手拖狗的他，忽然以右手「fing起」愛女練臂力，寓陪囡囡玩於健身，而只見Ava於半空中「起飛腳」，曉積文依然面不紅氣不喘，果然fit爆！另外，上周日向他扔陰毛剃刀的女狂迷前日正式被起訴，未知他是否因此而心情興奮，當街「表演」！而動作巨星史泰龍（Sylvester Stallone）同日亦帶女行街食雪糕，不過手上青筋暴現頗為驚嚇！
另外，幾乎日日被拍到湊女的女星珍妮花嘉娜（Jennifer Garner）前日亦有帶大女Violet外出，一向好動又有表演欲的Violet下車時對住記者鏡頭毫不怕醜，更試圖用兩手攬晒四隻毛公仔，雖然一公仔「墮地」，但仍無阻Violet表演「用埋塊面夾公仔」，更向鏡頭擺鬼臉，認真活潑，而旁邊獨自搬小型家電的珍妮花亦唔阻囡囡表演，獨力關車門！
此外，名模Alessandra Ambrosio同日帶愛女Anja戴母女帽現身Coachella音樂節，而謝茜嘉艾芭（Jessica Alba）則與老公Cash Warren撇下兩女去音樂節拍拖！另一方面，《權力遊戲》（Games Of Thrones）男星Peter Dinklage亦當街「橫抱」囡囡，場面驚險又有趣！
文：外娛組