秋生怒插：跳水收買人命
近日內地跳水節目為搞噱頭，邀來當紅藝人參加，日前不幸有人遇溺喪命，隨即掀起四面八方的批評聲討，不少粉絲更要求電視台停播及偶像退賽等。黃秋生前晚亦在微博力斥節目收買人命，不如索性叫藝人跳樓。秋生昨日接受訪問時，直斥如此瘋狂、荒謬、玩命的戇居節目，應該叫電視台台長親身上陣。
內地浙江衞視及江蘇衞視，近日分別推出藝人跳水節目《中國星跳躍》及《星跳水立方》，找來知名藝人充當跳水健兒，參與高危跳水玩意。繼參賽者蔡卓妍（阿Sa）、韓庚、李彩華等接連受傷後，日前武打明星釋小龍助手彭佳璇，在陪同釋小龍於《中國星跳躍》練習場時意外溺斃。前晚秋生在微博有感而發：「跳水節目終於出事，玩命節目，他們不想清楚的嗎？建議叫明星去跳樓，看誰命大，收視更佳。」
主辦方曾邀參賽
秋生昨日接受電話訪問，他說：「我冇睇過個節目，我亦無意干涉內地節目應該點製作，但叫個藝人去跳水，一聽就知危險，唔係話藝人唔跳得水，而係安全措施一定要做到好足，依家死咗人，就證明安全措施做得唔夠。（擔心阿Sa？）貿貿然叫藝人去跳水，咁高撞入水，隨時眼盲、面鎅開，直頭係『牙煙』，根本就係攞人命嚟較飛！不如索性鋪張氣墊喺地，叫啲藝人由十樓開始起跳，十層、十層咁逐級上，收視咪仲高！如果訓練兩個禮拜就上得跳水台，田亮仲使受訓咁多年？」
秋生續說：「個節目有搵過我，但助手幫我推咗，後尾助手話番畀我知，我聽到之後第一個反應係『黐筋』，我多謝佢哋搵我，但搵錯人啦！之前都有人搵藝人笨豬跳，但有好嘅安全措施，咁樣十幾米跳落水，隨時瓜柴o架！（呼籲觀眾罷睇，免助長收視？）搞節目唔係話刺激、好睇就做得咁戇居o架，唔去叫個台長落場？我唔係針對內地、唔係針對個節目，我係有感而發，希望香港啲節目以此為戒，有則改之，無則加勉。」雖然秋生維護藝人安全而講到慶合合，但前晚九時左右，他與女助手到大坑酒吧飲酒，兩人有講有笑，心情未受影響。
阿澤勸量力而為
而早前到內地錄影遊戲節目的杜汶澤，脫鞋行平衡木不慎跣倒，撞至腳脛紅腫，痛到標眼水，幸現已無大礙，對於阿Sa前晚繼續錄影跳水節目，令腰患痛上加痛，阿澤亦替對方擔心，並暗示她該見好即收：「阿Sa有勇氣面對自己恐懼，挑戰自己，係值得敬佩，但凡事都應該量力而為。」
文：影視組