趙世曾見Sean破冰第一步
富商趙世曾一直不肯接受女兒趙式芝（Gigi）與波爾錶太子女楊如芯（Sean）的同性婚姻，曾揚言用5億為女兒招婿，圖拗直女兒。前晚趙生、Gigi和Sean三人同獲邀出席欣賞音樂劇，首次同場見面，昨日Sean回覆本報時稱，與趙生在場內有打招呼，踏出破冰第一步。
前晚Gigi與「太太」Sean拍拖欣賞音樂劇，她表示知悉父親也會出席，問到趙生與Sean見面是否OK時，她說：「唔知呀！OK啩！（一齊坐？）唔知。（三個人試過同枱食飯未？）未呀！將來有機會嘅！（爹哋仲未接受佢？）未主動去約。（今次特登約埋睇？）唔係，係大會請，爹哋鍾意睇唔同嘅騷。（幾時約三個人一齊食飯？）暫時未有計劃，快o架啦！（三人同場，係咪令關係踏進一大步？）香港唔係好大，應該多機會同場。」
場內有打招呼
而隨後到場的趙生，身邊出現一位長髮索女，趙生受訪期間，還拉趙生衫尾催促趕快入場，上樓梯時又主動拖趙生手，而這位索女大前晚亦陪着趙生到中環開餐，雖然連續兩晚陪伴左右，但趙生卻否認是新女友，他笑說：「佢係秘書，可以叫佢孫小姐。」問到知否Gigi與Sean也出席？他說：「唔知！（一齊坐？）唔知，大會安排，應該唔會。（Gigi想約你同阿Sean三人食飯？）唔知！（叫到肯唔肯？）唔使嘛！（仲未接受？）我唔識佢o架！（你個招婿計劃點？）你哋問Gigi，唔係我招婿，係佢招呀！」昨日記者致電Sean，她直認有見到「老爺」（趙生），她說：「有見到，有打招呼，冇乜嘢，OK。」
另外，同場還有余安安偕同大女出席，安安指細女仍在洛杉磯讀書，早前波士頓馬拉松爆炸事件，指女兒有朋友當時亦有份跑馬拉松，幸好人冇事，她坦言也擔心美國的治安問題，然而女兒喜歡美國生活，下月畢業後也會留在當地。
文：名人組