周秀娜遭虐打冇忽好肉

性感女神周秀娜昨日與藝員陳嘉佳（細細粒）出席減肥產品活動，但見穿上露臂連身短裙的娜姐雙臂、雙腿明顯有一撻撻瘀青，左腳踝的舊患仍包紮着，她說：「我畀人虐打，全身可以話冇忽好肉，昨日拍戲畀人掟埋牆，搞到面腫兼周身瘀。（部戲拍完未？）未拍晒，要拍到5月，所以會keep住周身瘀同周身痕，因為拍戲嘅地方都幾污糟又好多蚊。」

以一敵十

問娜姐可會覺得行性感比做打女舒服？她說：「打都要性感o架！同埋我喺戲入面嘅衫比較清涼，加唔到防禦措施。（再拍打戲會唔會加片酬？）會，要逐樣加。（你身手敏唔敏捷？）敏捷o架。（咁都周身瘀？）我要以一打十o架嘛。」

娜姐又表示早前暴瘦是因要試食減肥產品，現在已停食，故體重已回復一百磅。

細細粒指娜姐是她的女神，很羨慕對方的身材，現時自己的體重徘徊於二百四十磅，但稍後將拍攝三套劇集，監製亦擔心以她目前的體形會應付得很辛苦。

文：名人組