趙碩之孖斷背舊愛濕平冇尷尬
曾被傳斷背的趙碩之，大前日與一位長髮女友人到中環購物，甫見記者拍照，女友人即尷尬躲在碩之身後避鏡頭，原來該長髮女正是碩之傳聞中的同性密友「沙律」，碩之更直認對方是其舊愛。
現年25歲、擁36D逼爆上圍的趙碩之，入行不久被傳斷背，指她中學時期甚受女同學歡迎，更有一位名叫「沙律」的圈外同性密友。年前她與任職侍應的男友分手後，去年被爆搭上從事鐘錶生意的富商男友Danny，但相戀數月便分手收場。
態度友善任影
回復單身的碩之，大前日封胸現身中環shopping，並找來一位長髮女子相伴，該女友人原來正是曾與她傳緋聞的「沙律」。兩女在時裝店內睇衫時互相給予意見，雞啄唔斷。逗留短短15分鐘，碩之與沙律已購下心頭好步出，甫見記者拍照，沙律即搵碩之做擋箭牌，尷尬躲在其身後避鏡，心情大靚的Wylie則笑笑口頭點頭示好，還大方企定定影相，態度友善，其後兩女雙雙搭港鐵走人。
再見亦是朋友
碩之昨日接受電話訪問，她指「沙律」快將結婚，故相約歎茶傾偈。問到以前是否情侶？碩之直認沙律是舊愛：「以前同初戀男友散咗之後，諗住唔想再同男仔拍拖，怕唔開心。有一日我去搵個best friend傾偈，佢哋幾個喺度打緊牌，我覺得個女仔（沙律）好爽，性格幾好。當時我心諗，入咗行之後都會有人傳我斷背o架啦，都唔爭在啦！之後我哋兩個單獨約會咗幾次就一齊咗。即使依家分開咗，我哋都仲係好close嘅朋友。」她透露現時有追求者，但不心急拍拖，寧缺莫濫。
文、攝：追蹤組