Yo Yo撐伊健全場嗌大嫂
【卓志恒澳門直擊】鄭伊健前晚在澳門舉行演唱會，老婆蒙嘉慧（YoYo）前晚公開現身力撐老公，伊健兩位「古惑仔」手足林曉峰（阿Lo）和錢嘉樂，更帶領全場一齊向YoYo嗌「大嫂」，氹得YoYo冧爆甜笑。
「浩南哥」鄭伊健前晚在澳門開騷，老婆YoYo更婚後首次現身演唱會支持老公。伊健在台上勁歌熱舞，獻唱《極速》時更以開胸恤衫上陣，大騷六舊「朱古力」。三年前伊健在澳門演出時，有粉絲即場成功求婚，前晚他與這對夫妻相認，伊健問：「你哋婚姻美滿嘛？幾時生？」豈料對方回答：「等你！」伊健隨即卸膊：「唔關我事o架！」而已為人母的楊千嬅亦透過短片催伊健盡快生B，她說：「恭喜你娶到YoYo咁好嘅老婆，祝你早生貴子。」
三兄弟愛疊字
伊健邀得「古惑仔」年代兩位好兄弟阿Lo和嘉樂攜眷（Lily康子妮和湯盈盈）出席兼擔任嘉賓，阿Lo笑言三兄弟同樣偏愛疊字（YoYo、Lily、盈盈），當鏡頭影住YoYo時，嘉樂即呼籲全場一同叫「大嫂」，見YoYo不停點頭兼冧爆甜笑。之後阿Lo憶述電影《古惑仔》第一集正是在澳門取景，更預告「古惑仔」會重出江湖，全場即拍爛手掌。
生仔順其自然
完騷後，提到粉絲與千嬅都祝伊健與YoYo早生貴子，他說：「唔好啦呢啲嘢，睇吓身邊啲人生咗會點先啦，不嬲都冇呢個打算，但既然千嬅咁講，就放長雙眼，順其自然啦。（全場嗌大嫂時，YoYo係咁點頭。）其他兩個阿嫂都點得好勁啦！」伊健又透露打算讓古惑仔重出江湖：「唔會拍電影，但都想三個人一齊開騷，因為各人都有一技之長，但都仲諗緊，要度吓先。」談到好友郭富城與熊黛林敵不過七年之癢：伊健說：「唔好講喇，佢開心就得。」