鄧萃雯寸Lynn冇資格表態

鄧萃雯、陳豪等一班無綫劇《金枝慾孽貳》演員，昨日到鑽石山荷里活廣場宣傳，苟芸慧近日因捲入「富黛戀」分手而被斥「小三」，網友更發起罷睇《金》，雯女說：「好無聊！收視好閒，我擔心佢個人。（佢為乜缺席？）可能怕被攞嚟做話題，無憑據嘅嘢，寫十次就當真。我唔知內情，但一段感情唔只一個第三者，旁觀者唔應畀評語，郭富城都唔完全表態，仲好輕鬆咁，我覺得苟芸慧應該唔關事，有男士喜歡佢，都唔關佢事吖！（但熊黛林矛頭直指苟芸慧？）任何事應該由男人講，有乜理由女人爭住講？冇人有資格講嘢！苟芸慧份人好純。（戥佢慘？）唔係事實被人亂寫，我都係過來人，內地傳媒係唔求證，直接揀最激嘅嚟抄，所以我好忟憎。」

唔知蔡少芬生咗

而伍姑娘亦力撐苟姑娘，她說：「我同苟芸慧都friend，但冇傾私生活，觀眾點諗我唔理，我支持同信任佢。」對於昔日好友陳山聰同何超雲離離合合，伍姑娘笑言︰「No comment！（點解咁好笑？）我笑係套劇出街，我同佢好耐冇聯絡。」

心情大靚的陳豪（左）被爆出埠探女友陳茵媺班。

伍姑娘玩遊戲時被黃德斌抱起。

陳豪則被爆出埠探女友陳茵媺班，他說：「我應承咗探佢。（帶乜去？）唔講得，我見工作人員好照顧佢，都好安心。（再去？）怕佢分心，等佢專心啲拍嘢。」陳豪又說：「我唔知蔡少芬生咗，會短訊恭喜佢。」被記者笑太out。蔡少芬就透過電話與眾演員分享近況，她說：「我都知陳豪唔留意我，證明我哋係冇路！」

文：影視組