城城冷對Lynn 呵護苟姑娘

「富黛」七年情早前已傳出因苟芸慧介入而變得危危乎，前晚Lynn於微博上載尾指戴戒指照，並留言說「重新上路」，似在暗示與城城這段七年情已正式玩完，據知兩人分手除Lynn逼婚不成吵大鑊外，與苟姑娘的緋聞亦令她不能忍受。

昨日大批記者分別在「Lynn、城」住所門外等候，惟情傷後的Lynn繼續潛水未有現身，今日她會出席公開活動，相信到時會回應分手之說。城城昨晚就一臉風騷出席電影《同謀》慶功宴，昨晚七時十分，城城由司機接載下乘七人車離家到尖沙咀慶功宴現場，司機前往尖沙咀期間更兩度衝燈。城城抵埗下車時即戴上黑超和着上西裝褸，現場已有五、六名保安守候護駕。

熊黛林前晚在微博上載尾指戴戒指的相，並留言重新上路，惹來與城城分手之說。

苟姑娘被指是小三，其後在宣傳活動上更眼濕濕。

拒答是否單身

出席慶功宴的除城城外，還有張家輝及導演彭順，城城明顯心情靚爆，全程笑晒，又對電影票房表滿意。身旁的家輝讚他口甜舌滑，城城說：「係，最開心同家輝合作，多咗個朋友。」記者即指他卻少了個女友（Lynn），城城即時面色帶點凝重的說：「問呢啲我唔會答，大家知我性格，私人嘢一直都唔答，感情隨緣。（你依家係咪單身？）我要答嘅都答晒，唔想再回應。（心情靚？）有工作吖嘛，我不嬲對工作好有熱誠，不止講，做出嚟。」

城城應付記者時，張家輝（左）在旁插科打諢一番。	熊黛林整天足不出戶，未見蹤影。	城城去尖沙咀出席慶功宴時，司機一度衝紅燈。

家輝可有關心城城的感情事？他說：「我哋唔講，佢想講就講。」城城語帶感慨說：「講嚟做乜，下星期我要去北京做宣傳。」問他會否去Lynn的家鄉南京？城城就扮作聽不到，沒有回答。家輝企圖為城城解圍，叫記者幫他搞緋聞，城城抵死地說：「佢啲緋聞搞極搞唔起，今日畀個機會你，同我搞！」家輝即笑言春光乍洩不適合他。

向苟say sorry

記者再追問「城Lynn」的關係時，城城帶點勞氣的說：「感情隨緣，我一直好低調，想保持私人空間，唔會再講。自己一直好畀心機拍戲，拍呢套戲入面有場跳橋戲幾乎命都唔要，你哋嚟到就講緋聞，唔該尊重吓演員。」雖然城城不願多談Lynn且態度冷漠，但提到「新歡」苟姑娘昨日在活動上哭泣，城城卻毫不避忌，更出言護花，與談及Lynn時的態度天壤之別：「吓，咁慘？其實唔使喊，清者自清，但佢性格係咁，不過其實我哋又唔係好熟。」家輝提議城城請女方吃飯作補償，城城說：「吓，呢個時間請食飯，唔好喇卦！」之後又主動開口叫記者跟苟姑娘講不好意思：「因為不實嘅報道，傷害咗女仔嘅聲譽。」護花之情盡現。